Şirvanda gecə saatlarında avtoqəza baş verib, sürücü yaralanıb.
APA-ya Şirvan Polis Şöbəsindən verilən məlumata görə, ötən gecə saat 22.00 radələrində Şirvan şəhərinin “Köhnə şəhər” yaşayış massivində Şirvan şəhər sakini, 1985-ci il təvəllüdlü Xankişiyev Natiq Həsən oğlu idarə etdiyi "VAZ 2106" markalı 18 BF 439 dövlət nömrə nişanlı avtomobillə sürətlə ötmə əməliyyatı zamanı Masalllı rayonu Musaküçə kənd sakini, 1990-cı il təvəllüdlü Qasımov Elçin Yaqut oğlunun idarə etdiyi DAF markalı 99 EJ 756 dövlət nömrə nişanlı avtomobil-treylerin qoşqusunun arxa təkərinə çırpılıb.
Nəticədə "VAZ 2106"nın sürücüsü yaralanaraq Şirvan Şəhər Xəstəxanasına yerləşdirilib. Avtomobil isə tamamilə yararsız hala düşüb. Faktla bağlı Şirvan Polis Şöbəsində araşdırma aparılır.
Milli.Az