Bakı, 16 yanvar, AzərTAc
Yanvarın 16-da Rusiyanın Sankt-Peterburq şəhərində FIFA-nın prezidenti Yozef Blatter ilə AFFA-nın prezidenti Rövnəq Abdullayev arasında görüş keçirilib.
AzərTAc xəbər verir ki, görüşdə 2014-cü il ərzində Azərbaycan futbolun inkişafı məqsədilə həyata keçirilmiş tədbirlər, inşası başa çatmaqda olan Bakı Olimpiya Stadionunun hazırkı vəziyyəti barədə ətraflı məlumat verilib, stadionun tikinti prosesini əks etdirən videoçarx nümayiş olunub.
FIFA prezidenti AFFA rəhbərliyinin məlumatını dinlədikdən sonra görülən işlərdən məmnunluğunu bildirib.
Görüşdə FIFA-nın kommunikasiya və ictimaiyyətlə əlaqələr direktorunun müavini Nikolas Meynqot, FIFA-nın Avropada futbolun inkişafı üzrə Proqramının meneceri Yeva Paskue, FIFA prezidentinin assistentləri Edvard Braun və Qay-Filipp Matye, AFFA-nın baş katibi Elxan Məmmədov iştirak ediblər.
