Prezident müəllimlərin maaşlarının artırılması haqqında sərəncam versə də, müəllimlər arasında bu artımın nə vaxtdan hiss ediləcəyi haqqında bəzi anlaşılmazlıqlar yaranıb."Sərəncamdan irəli gələn məsələləri həll etmək müəyyən vaxt aparacaq"
Təhsil Nazirliyinin mətbuat xidmətinin rəhbəri Cəsarət Valehov anspress-ə açıqlamasında bildirib ki, müəllimlərin maaşları yanvar ayından etibarən prezidentin sərəncamına müvafiq olaraq - artırılmış formada hesablanacaq və veriləcək.
Onun sözlərinə görə, prezidentin sərəncamından irəli gələn məsələləri həll etmək müəyyən vaxt aparacaq. "Amma bunların maaşların hesablanmasına heç bir aidiyyatı yoxdur".
Xatırladaq ki, Azərbaycan Prezidenti İlham Əliyev dövlət ümumi təhsil müəssisələrində çalışan bilik və bacarıqlarının diaqnostik qiymətləndirilməsi aparılan müəllimlərin dərs yükünün və əməkhaqqının artırılması haqqında sərəncam imzalayıb. Sərəncama əsasən, dövlət ümumi təhsil müəssisələrində çalışan bilik və bacarıqlarının diaqnostik qiymətləndirilməsi aparılan müəllimlərin həftəlik dərs yükü norması 1,5 dəfə, aylıq vəzifə maaşları orta hesabla 2 dəfə artırılıb.
Milli.Az
