Bunu APA-ya açıqlamasında Müsavat Partiyası başqanının müavini Səxavət Soltanlı Müsavat başqanı Arif Hacılının Azərbaycan Xalq Cəbhəsi Partiyasının (AXCP) sədri Əli Kərimli ilə görüşü ətrafında yaranan qalmaqala münasibət bildirərkən deyib. O bildirib ki, Müsavat Partiyasının bu görüşdə məqsədi müxalifət daxilində olan lazımsız, mənasız mübahisələri aradan qaldırmaq və bütün gücü demokratik mübarizəyə sərf etmək olub.
S. Soltanlının sözlərinə görə, görüş normal keçsə də, qarşı tərəfdən adekvat olmayan fikirlər səsləndirilib: “Bu fikirlər onlara başucalığı gətirmir. Görüşdə ölkədəki ictimai-siyasi vəziyyət, əməkdaşlıq barədə müzakirələr aparıldı. Kimlərsə bu gün və gələcəkdə özlərini bizə müxalifətdə görəcəklərsə, bu, bizim problemimiz deyil. Müsavat Partiyası bundan sonra da öz yoluna davam edəcək və demokratik mübarizənin önündə olacaq. Partiya digər siyasi partiyalarla da mümkün əməkdaşlığın artırılması istiqamətində fəaliyyətini davam etdirəcək”.