Bakı, 23 yanvar, AzərTAc
Fevralın 21-də Bakıda ikinci “Mövsüm Səyahət Yarmarkası” keçiriləcək. Azərbaycan Turizm Assosiasiyasının (AZTA) təşkilatçılığı, Mədəniyyət və Turizm Nazirliyinin dəstəyi ilə baş tutacaq yarmarkada 20-dək turizm şirkətinin və mehmanxananın nümayəndələri iştirak edəcək.
Bu barədə AzərTAc-a Mədəniyyət və Turizm Nazirliyi regionlarda turizmin inkişafı sektorunun böyük məsləhətçisi Cəfər Qarayev məlumat verib. Onun sözlərinə görə, ikinci “Mövsüm Səyahət Yarmarkası” bu dəfə “28 Mall” ticarət mərkəzində keçiriləcək. Daxili turizmin dəstəklənməsi və təbliğ etdirilməsi məqsədilə baş tutacaq bu növbəti yarmarka Novruz bayramı münasibətilə təşkil olunacaq.
Yarmarkada Azərbaycan daxilində reallaşdırılacaq Novruz turları, Bakıda və regionlarda fəaliyyət göstərən hotellərdə, istirahət mərkəzlərində təşkil ediləcək bayram proqramları və bu münasibətlə hazırlanmış turpaketlər barədə vətəndaşlarımıza, eləcə də şəhərimizin qonaqlarına məlumatlar veriləcək.
