Bakı. Zümrüd Paşayeva - APA. Cənubi Koreya, ABŞ və Yaponiya Şimali Koreyanın nüvə və raket proqramları ilə bağlı kəşfiyyat məlumatlarının mübadiləsi haqqında pakt imzalayacaq.
APA-nın “YONHAP” informasiya agentliyinə istinadən xəbərinə görə, sözügedən müqavilə dekabrın 29-da üç ölkənin müdafiə nazirlərinin müavinləri tərəfindən imzalanacaq.
Adının çəkilməsini istəməyən Cənubi Koreya Müdafiə Nazirliyinin rəsmisi mübadilə olunacaq informasiyaların sənədlər, fotolar və elektron məlumatlar formasında olacağını bildirib: “Biz həssas məlumatları birbaşa olaraq Yaponiyaya deyil, ABŞ-a ötürəcəyik. Bu məlumatlar təsdiqləndikdən sonra Yaponiyaya ötürüləcək. İmzalanacaq müqavilə dövlətlərarası olmayacaq və xüsusi təsdiqlənmə tələb etməyəcək".