“Şəxsən mən 6 ay idi ki, orada işləyirdim. İdarəyə işə düzələndə 2000 manat depozit qoymuşdum. 700 manat da aylıq maaş təyin olunmuşdu. 3 ay maaşımızı verəndən sonra başladılar süründürməyə”.
Bunu virtualaz.org saytına açıqlamasında “Qala” Beynəlxalq Mühafizə İdarəsinin Tərtər şöbəsinin işçisi Rauf Alməmmədov deyib.
Onun sözlərinə görə, ilk 3 ay ərzində maaşını vaxtında alsa da, sonrakı aylar maaş ala bilməyiblər. İndi onlara nə əvvəldən depozit kimi ödədikləri pullar qaytarılır, nə də işlədikləri ayların maaşları verilir.
Bakıda da “Qala” Mühafizə İdarəsinin azı 120 işçisi şirkətə əvvəlcədən ödədikləri depozitlərin qaytarılması və işlədikləri müddətin maaşlarının tələbi ilə aksiya keçiriblər.
Rauf Alməmmədovun sözlərinə görə, şirkətin bölgələrdə aldatdığı adamların sayı paytaxtdakılardan bir neçə dəfə çoxdur: “Təkcə Tərtərdə yox, şirkətin Bərdə, Goranboy, Ağcabədi, Mingəçevirdə olan şöbələrinin yüzlərlə işçiləri eyni aqibəti yaşayır. Ən az işçi bizdə idi - 143 nəfər. Ancaq digər rayonlarda işçilərin sayı daha çox idi. Məsələn, Ağcabədidə 200, Bərdədə azı 150 işçi çalışırdı. Bu adamların hamısı şirkətə işə düzələndə depozit ödəmişdi. Belə çıxır ki, hamının pulu batıb”.
Rauf Alməmmədov deyir mühafizə idarəsinin Tərtərdəki ofisi neçə gündür ki, bağlıdır. İşçilər hara və kimə müraciət edəcəklərini bilmirlər.
Qeyd edək ki, şirkətin Bakıdakı şəbəkəsində çalışan və aldadıldıqlarını bildirən azı 120 nəfərin məlum aksiyalarından sonra məsələyə hüquq-mühafizə orqanları qarışıb. Baş Prokurorluq “Qala” BTX və “Azər Mühafizə” MMC-nin direktoru Vüqar Hüseynov barədə məlumat yayıb. Həmin məlumata görə, Vüqar Hüseynov bir qrup şəxslə əlbir olaraq ayrı-ayrı adamları işə düzəltmək adı ilə aldadıb. Həmin adamlardan guya cəmiyyətin depozit hesabına pul keçirmək adı ilə müxtəlif məbləğlərdə pullar alıb. Onlara ötən ilin noyabr ayınadək müxtəlif məbləğlərdə əmək haqlarını qismən ödəyib. Sonradan isə “yoxa çıxıb”.
Buna görə də Vüqar Hüseynov Cinayət Məcəlləsinin dələduzluq maddəsi ilə məsuliyyətə cəlb olunub və barəsində həbs-qətimkan tədbiri seçilib. İş üzrə istintaqı Bakı Şəhər Baş Polis İdarəsi aparır.
