Ali və orta ixtisas məktəblərində ödənişli təhsilin ləğvi ilə bağlı xəbərlərə aydınlıq gətirildi

Ali və orta ixtisas məktəblərində ödənişli təhsilin ləğvi ilə bağlı xəbərlərə aydınlıq gətirildi
13:37 26 Yanvar 2015
275 Sosial
Ölkə mətbuatı
A- A+

Azərbaycanda ali və orta ixtisas təhsili müəssisələri üçün ödənişli əsaslarla qəbul olan tələbə sayına məhdudiyyətlər ləğv olunacaq. Trend-in məlumatına görə, bunu Təhsil Nazirliyinin Aparat rəhbərinin müavini Yaqub Piriyev bu gün keçirilən mətbuat konfransında deyib.

Onun sözlərinə görə, "Azərbaycan Respublikasında Təhsilin İnkişafı üzrə Dövlət Strategiyası"nda ali və orta ixtisas təhsili müəssisələrində ödənişli təhsil üzrə qəbul planının ləğv edilməsi nəzərdə tutulur. Ancaq bu, təhsilə görə ödəniş haqlarının ləğvi demək deyil: "Burada ödənişli əsaslarla qəbul olan tələbə sayına qoyulan məhdudiyyətlər ləğv olunacaq və təhsil haqqı isə əvvəlki kimi olacaq".

Y.Piriyev qeyd edib ki, orta və ali təhsil müəssisələrinə tələbələrin potensialı, maddi-texniki baza, elmi pedoqoji potensial, mövcud laboratoriya bazası nəzərə alınmaqla imkan verilən miqdarda ödənişli əsaslarla tələbə qəbul etmələrinə imkan yaradılacaq: "Bu gün dünyanın heç bir yerində ödənişsiz təhsil sistemi yoxdur. Sadəcə dövlət büdcəsindən ödənilmə var. Odur ki, strategiyadan irəli gələn məsələdə söhbət ödənişli təhsilin ləğvindən yox, sadəcə qəbul planının ləğvindən gedir".

Təhsil Nazirliyinin Məktəbəqədər və ümumi təhsil şöbəsinin müdiri Aydın Əhmədov isə 12 illik təhsilə keçidlə bağlı bəzi məsələlərə aydınlıq gətirib. Dünya ölkələrində ümumi təhsilin müddətinin 12 il və daha artıq olduğunu deyən A.Әhmədov əlavə edib ki, indidən hansı tədris ilindən 12 illik təhsilə keçiləcəyi barədə danışmaq tezdir.

Onun sözlərinə görə, Azərbaycanda da 12 illik təhsilə keçidlə bağlı tədris proqramlarının dəyişdirilməsi lazımdır: "Buna da müəyyən işlərdən başlamaq lazımdır. Kurrikulum üzrə keçən müddət ərzində təhsil prosesində müəyyən təhlillər aparılıb. Hazırda kurrikulumların 12 illik təhsil sisteminə uyğunlaşdırılması nəzərdə tutulur. Bunun üçün müəyyən müddət müəyyənləşdirilib. İlk olaraq 12 illik təhsilə keçidlə bağlı mütəxəssislərdən ibarət işçi qrupu yaradılacaq”.

Milli.Az


Xəbərin orijinal ünvanı: http://news.milli.az/society/321013.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR