Bakı. Musa Əhmədov - APA-Economics. Azərbaycanın Yekaterinburqdakı baş konsulu Sultan Qasımov Tümen vilayətinin qubernatoru Vladimir Yakuşev ilə görüşüb.
"APA-Economics"in qubernatorun mətbuat xidmətinə istinadən verdiyi məlumata görə, azərbaycanlı diplomat 2015-ci ildə Tümen nümayəndə heyətini Bakıya səfər etməyə dəvət edib. Qubernator buna müsbət cavab verib.
Tərəflər arasında əməkdaşlığın perspektivli istiqaməti qismində neft-qaz maşınqayırması, səhiyyə, təhsil və turizmin inkişafı, neft-qaz xidmətində yeni texnologiyaların işlənilməsi və neft emalı sahələri qeyd olunub.
Bundan başqa, inşaat sahəsində təcrübə mübadiləsi, ikitərəfli ticarətin genişləndirilməsi də mümkündür.