Aktual mövzular: Dollar alış-satışı , Çempionlar Liqası, Hava haqqında, Məzənnə, Neftin qiyməti

Bakının beş addımlığında yaddan çıxmış məkan

Bakının beş addımlığında yaddan çıxmış məkan

Date: 12 November 2015 22:05

"Gəlsin bir hökumət nümayəndəsi, geyindirək ona uzunboğaz rezin çəkməni, yolun bu üzündən o üzünə keçsin, görək, keçə biləcək?"

Milli.Az azadlıq.org-a istinadən bildirir ki, Hövsanın əvvəllər quşçuluq təsərrüfatı fəaliyyət göstərən ərazisində indi saysız-hesabsız yaşayış evləri tikilib. Elə adı da "Quşçuluq massivi" qalıb.

Torpaq sahəsi ucuz olduğuna görə əsasən bölgələrdən gələnlər burada ev-eşik tikib məskən salıblar. Uzun illərdir bu məkanda yaşayış olsa da, insan həyatı üçün vacib şərait tam şəkildə yaradılmayıb.

DƏRMAN RESEPTİ ÜÇÜN SURAXANIYA

Burada yaşayanlar yol, qaz, işıq, su, hətta tibb məntəqəsi sarıdan korluq çəkir.

Yaşayış massivinin sakini Mərdan Rüstəmov deyir, 16 ildir ki, ailəsi ilə burada ev-eşik tikib yaşayır. Yaşayış massivinin problemlərindən danışır:

"Bir aptekimiz, bir tibb məntəqəmiz yoxdur. Birini ağrı tutanda başımızı itiririk. Şəkər xəstələri dərman resepti üçün Suraxanıya gedir. Körpələri peyvəndə, müayinəyə kənara aparırıq".

KEÇİLMƏZ YOLLARLA

Yaşayış massivinin başqa sakini Oqtay Kərimov deyir, yağış yağanda yollar keçilməz olur:

"Camaat çox əziyyət çəkir. Gəlsin bir hökumət nümayəndəsi, geyindirək ona uzunboğaz rezin çəkməni, yolun bu üzündən o üzünə keçsin, görək, keçə biləcək? Hər yağışdan sonra yollar belə vəziyyətə düşür. Nə maşınlar rahat hərəkət edə bilir, nə də evə gedib-gəlmək olur. Avtobus da yolda xarab olub qalır".

Bu yollar əsasən də azyaşlılar üçün təhlükəlidir. Çünki yağışdan sonra yollarda yığılan qrunt suları sürüşkənlik yaradır, avtomobillərin hərəkəti çətinləşir. Sürüşmələr hadisələrə səbəb olur.

Oqtay Kərimov: "Hamının uşağı məktəbə gedir. Məktəb də buradan uzaqdır. O qədər kələ-kötür, təhlükəli yollardır ki, uşaqları məktəbə özümüz aparıb-gətirməyə məcburuq".

İCRA HAKİMİYYƏTİNDƏN GƏLƏN OLMAYIB

Daha bir vacib məsələ su ilə bağlıdır. Əsasən yayda sakinlər suyu əraziyə gələn su maşınından alırlar.

Sakinlərin deməsinə görə, yaşayış massivinin problemlərinə görə döymədikləri qapı qalmayıb. Deyirlər, yağış yağıb, yollar keçilməz olub, icra hakimiyyətindən, kanalizasiya idarəsindən bir adam əraziyə gəlib vəziyyətlə maraqlanmır.

Suraxanı rayon İcra Hakimiyyətindən bildiriblər ki, yeni yaşayış massivindəki evlərin çoxu sənədsizdir. Burada doğrudan da problemlər var. Ancaq vəziyyət heç də sakinlərin dediyi kimi, dözülməz deyil. Ümumiyyətlə isə, Bakıətrafı kənd və qəsəbələrin sosial-iqtisadi inkişafı proqramına uyğun olaraq, ərazidə yaşayış şəraitinin yaxşılaşdırılmasına görə bir sıra işlərin görülməsi nəzərdə tutulub.

Milli.Az


Tags:  Bakının beş addımlığında yaddan çıxmış məkan


RƏYLƏR


Top news