Bakı. 2 dekabr. REPORT.AZ/ Bu gün AMEA akademik Z.M.Bünyadov adına Şərqşünaslıq İnstitutunun təşkilatçılığı ilə 1941-1946-cı illərdə İran xalqlarının və cənubi azərbaycanlıların milli-demokratik hərəkat tarixinə həsr olunmuş "21 Azər – 70" mövzusunda elmi konfrans keçirilib.
Bu barədə "Report"a institutdan məlumat verilib.
Tədbirə deputatlar Arif Rəhimzadə, Fərəc Quliyev də qatılıb.
Tədbiri giriş sözü ilə millət vəkili, AMEA akad. Z.M.Bünyadov adına Şərqşünaslıq İnstitutunun direktoru, AMEA-nın müxbir üzvü, professor Gövhər Baxşəliyeva açıb və "21 Azər" hərəkatının Yaxın və Orta Şərqdə milli-demokratik köklərə söykənən, əsrin ən mütərəqqi hərəkatlarından biri olduğunu və Azərbaycan xalqının tarixində şanlı bir səhifə açdığını bildirib: "Bu tarix bizim üçün ona görə əziz və yadda qalandır ki, Cənubi Azərbaycanda yaşayan soydaşlarımız zülmkar və irticaçı şahlıq rejiminə qarşı üsyan edib, özlərinin bəşəri haqları olan milli-demokratik hüquqlarını əldə edərək milli hökumətlərini qurublar".
G,Baxşəliyeva "21 Azər" hərəkatının Azərbaycan tarixinin ən önəmli səhifələrindən olduğunu vurğulayıb: "21 Azər" hərəkatı nəticəsində yaranmış Azərbaycan Milli Hökuməti Azərbaycan tarixində yaradılan müstəqil müasir milli dövlət nümunəsi olub. Azərbaycan Milli Hökuməti İran adlanan ölkədə azərbaycanlıların milli muxtariyyət hüququnu tanıyan bir hökumət kimi fəaliyyətə başlayıb, daha sonra isə siyasi istiqamətini müstəqil dövlətçilik səmtinə yönləndirmək istiqamətində ciddi addımlar atıb. "21 Azər" hərəkatının ən səciyyəvi, xarakterik və azərbaycançılıq üçün əhəmiyyətli cəhətlərindən biri onunla bağlıdır ki, bu hərəkat cənubi azərbaycanlıların milli şüurunun formalaşması prosesini başa çatdırmış oldu".
Tədbirin davamında mövzu ilə bağlı məruzələr dinlənilib.