Aktual mövzular: Dollar alış-satışı , Hava haqqında, Məzənnə, Neftin qiyməti

Slovakiya hökuməti Avropa İttifaqının qaçqınlarla bağlı qərarından şikayət verib

Slovakiya hökuməti Avropa İttifaqının qaçqınlarla bağlı qərarından şikayət verib

Date: 2 December 2015 19:48


Bratislava, 2 dekabr, AZƏRTAC
Slovakiya hökuməti Avropa İttifaqı tərəfindən qaçqınların üzv ölkələr arasında paylanmasına dair qərara qarşı Avropa Ədalət Məhkəməsinə şikayət verib. Hələ sentyabr ayında elan edilən və bu gün formal şəkildə rəsmiləşdirilən şikayətdə slovak hökuməti Avropa İttifaqı Şurasının Avropaya kütləvi qaçqın axınının nizamlanması məqsədilə qaçqınların Avropa ölkələri arasında kvota çərçivəsində paylanması barədə qərarının qeyri-qanuni elan olunmasını tələb edib. Baş nazir Robert Fitso Aİ-nin qərarını “diktat” olaraq tənqid edib və şikayətin Lüksemburqda yerləşən Avropa Ədalət Məhkəməsinə təqdim olunduğunu bildirib.
Qeyd edək ki, sentyabrın 22-də Avropa İttifaqı ölkələrinin daxili işlər nazirləri İtaliya və Yunanıstanın qaçqınlarla dolu düşərgələrindəki vəziyyəti nəzərə alaraq, 120 min qaçqının Avropa ölkələri arasında paylanması barədə qərar qəbul etmişdilər. Həmin səsvermədə Slovakiya, Çexiya, Macarıstan və Rumıniya qərarın əleyhinə olmalarına baxmayaraq, qərar bütün Avropa İttifaqı ölkələri üçün keçərli oldu. Elə həmin vaxt Slovakiya qərara qarşı şikayət edəcəyi ilə hədələmişdi.
Slovakiya hökuməti bu şikayətə dekabr ayı ərzində digər ölkələrin, ilk növbədə isə Macarıstanın qoşulacağına ümid edir. Polşa hökuməti sentyabr ayında qərara qarşı çıxsa da, seçkilərdən sonra yaranmış yeni hökumət bu addımı yanlış mövqe kimi tənqid edib.
Çexiya nümunəsi əsasında Slovakiya da qaçqınların qəbulunda və yerləşdirilməsində könüllülük prinsipinin tətbiq olunmasını tələb edir. Kvota çərçivəsində 2 mindən artıq qaçqın qəbul etməli olan Slovakiya elan edib ki, yalnız İraqdakı qaçqın düşərgələrinin birindən seçilmiş 149 xristian qaçqın qəbul etməyə hazırdır.
Elgün Niftəliyev
AZƏRTAC-ın xüsusi müxbiri
Bratislava

Tags:  Slovakiya hökuməti Avropa İttifaqının qaçqınlarla bağlı qərarından şikayət verib


RƏYLƏR


Top news