Aktual mövzular: Dollar alış-satışı , Hava haqqında, Məzənnə, Neftin qiyməti

“GreenCar”ın elektrik nəqliyyat vasitələri “BakuTel-2015”ə təqdim olunur

“GreenCar”ın elektrik nəqliyyat vasitələri “BakuTel-2015”ə təqdim olunur

Date: 3 December 2015 12:38


Bakı, 3 dekabr, AZƏRTAC
IDEA İctimai Birliyinin dəstəyi ilə innovativ-ekoloji layihələr həyata keçirən “GreenCar” elektrik nəqliyyat vasitələrinin satış mərkəzi “BakuTel-2015” XXI beynəlxalq sərgi və konfransında iştirak edir.
AZƏRTAC xəbər verir ki, sərgidə ilk dəfə təmsil olunan “GreenCar” ən son texnoloji yenilikləri özündə əks etdirən, ekoloji baxımdan təmiz elektrik avtomobilləri, motosiklləri və digər elektrik nəqliyyat vasitələrini təqdim edir. Eyni zamanda, burada elektrik avtomobilləri üçün enerjidoldurma məntəqələri də sərgilənir.
Qeyd edək ki, “GreenCar”ın təqdim etdiyi elektrik nəqliyyat vasitələri sərgi iştirakçılarının ilk gündən marağına səbəb olub. Elektrik avtomobilləri, motosiklləri və s. ilə yaxından tanış olan ziyarətçilərə onlarda tətbiq olunan texnoloji yeniliklər, elektrik nəqliyyat vasitələrinin ətraf mühitin qorunması baxımından üstünlükləri barədə məlumatlar təqdim edilir. İzləyicilərə, həmçinin enerjidoldurma məntəqələrinin işləmə qaydaları barədə informasiyalar çatdırılır.
Xatırladaq ki, “GreenCar” MMC IDEA İctimai Birliyinin dəstəyi ilə 2014-cü ildən ölkə ərazisində genişmiqyaslı innovativ-ekoloji layihələrin həyata keçirilməsinə başlayıb.
2015-ci il iyunun 17-dən isə “GreenCar” MMC, “Azərişıq” ASC və IDEA İctimai Birliyi ilə birlikdə həyata keçirilən bu layihə çərçivəsində Azərbaycanda elektrik avtomobilləri üçün enerjidoldurma məntəqələrinin quraşdırılmasına başlanılıb. Qeyd edək ki, ilk belə məntəqə Heydər Əliyev Mərkəzinin parkında quraşdırılıb. Müasir texnoloji vasitələrlə təmin olunan enerjidoldurma cihazlarının Bakının müxtəlif yerlərində və ölkəmizin bir sıra regionlarında quraşdırılması nəzərdə tutulur.
Elektrik avtomobilləri ilə bağlı bu layihələrin əsas məqsədi ən son texnoloji yeniliklərin Azərbaycana gətirilməsi, ətraf mühitin innovativ metodlarla qorunmasına xidmət etmək, bununla da ölkə ərazisində ətraf mühitin mühafizəsi və sağlam ekoloji mühitin yaradılmasına dəstək göstərməkdir.










Tags:  GreenCarın elektrik nəqliyyat vasitələri BakuTel-2015ə təqdim olunur



RƏYLƏR


Top news