Aktual mövzular: Dollar alış-satışı , Hava haqqında, Məzənnə, Neftin qiyməti

Masallıda əlillərin sosial problemlərinə diqqət artırılıb

Date: 3 December 2015 14:53


Masallı, 3 dekabr, Bağır Əliyev, AZƏRTAC
Dekabrın 3-də Masallı şəhərindəki Heydər Əliyev Mərkəzində Beynəlxalq Əlillər Günü ilə bağlı keçirilən tədbirdə əlillərin sosial problemlərinin həlli istiqamətində görülən işlərdən söhbət açılıb.
AZƏRTAC xəbər verir ki, tədbirdən əvvəl rayon icra hakimiyyətinin məsul işçiləri, Əmək və Əhalinin Sosial Müdafiəsi Mərkəzinin əməkdaşları, şəhər sakinləri birinci qrup əlillər - 19 yaşlı İlkin Bünyadova və 25 yaşlı Gülər Nurullayevaya baş çəkiblər.
Bayram süfrəsi ətrafında davam edən tədbirdə Əlil Qadınlar Cəmiyyəti Masallı rayon şöbəsinin sədri Əminə Abıyeva, rayon Əmək və Əhalinin Sosial Müdafiəsi Mərkəzinin direktoru Arzuman Hüseynov, Qarabağ Müharibəsi Əlilləri, Veteranları və Şəhid Ailələri Cəmiyyətinin sədri Nahid Rəhimov və başqaları əlillərə göstərilən dövlət qayğısından danışıblar.
Çıxış edənlər hər il bu kateqoriyadan olan vətəndaşların pensiya və müavinətlərinin artırılması, onların sosial-məişət və mənzil şəraitinin yaxşılaşdırılması məqsədilə ölkəmizdə ardıcıl tədbirlərin həyata keçirildiyini vurğulayıb, bu sahədə görülən işlərdən bəhs ediblər.
Qeyd olunub ki, rayonda yaşayan 5731 əlilin sosial problemlərinin həllinə diqqət artırılıb. Masallıda Qarabağ müharibəsi əlilləri və şəhid ailələri üçün 76 mənzilli üç yaşayış binası tikilərək istifadəyə verilib, 5 nəfər üçün fərdi evlər inşa olunub. Hazırda 6 yaşayış məntəqəsində əlillər üçün inşa edilən fərdi yaşayış evlərinin tikintisi davam etdirilir.
Əlillər onlara göstərilən diqqət və qayğıya görə Prezident İlham Əliyevə minnətdarlıqlarını bildiriblər.
Tədbir rayon bədii özfəaliyyət kollektivlərinin çıxışı ilə davam etdirilib.

Tags:  Masallıda əlillərin sosial problemlərinə diqqət artırılıb


RƏYLƏR


Top news