Aktual mövzular: Dollar alış-satışı , Hava haqqında, Məzənnə, Neftin qiyməti

Əmlak Məsələləri Dövlət Komitəsi mobil ofislər vasitəsilə yerlərdə fərmanın icrasına başlayıb

Əmlak Məsələləri Dövlət Komitəsi mobil ofislər vasitəsilə yerlərdə fərmanın icrasına başlayıb

Date: 4 December 2015 15:48


Bakı, 4 dekabr, AZƏRTAC
Əmlak Məsələləri Dövlət Komitəsi respublikanın şəhər və rayonlarında, birbaşa yerlərdə Azərbaycan Prezidentinin daşınmaz əmlakın qeydiyyatı sahəsində imzaladığı müvafiq fərmanın icrasına başlayıb.
Komitədən AZƏRTAC-a bildirilib ki, mobil ofis xidmətləri vasitəsilə ilk olaraq dekabrın 4-də Binəqədi rayonunda vətəndaşlardan fərmanda əks olunmuş mülkiyyət sənədlərinin qəbulu həyata keçirilib. Eyni zamanda, rayonun qəsəbələrində yaşayan 60-dək vətəndaşa keçmiş kolxoz və sovxozların ərazilərində yerləşən, müvafiq əmrlərlə verilmiş həyətyanı torpaq sahələrinə dair hazır çıxarışlar da təqdim olunub. Belə tədbirlərin məqsədi Bakı və regionlarda fərmanda əksini tapmış sənədləri olan əmlak sahiblərinə qeydiyyat xidmətlərini birbaşa yerlərdə çatdırmaq, vətəndaşların xidmətlərdən razılığını təmin etməkdir.
Qeyd edək ki, bu fərmanla qeydiyyat üçün tələb olunan sənədlərin siyahısına sovet dövründə yaşayış və bağ evlərinin tikintisinə dair həyətyanı torpaq sahələrinin ayrılması barədə kolxoz və sovxozlar tərəfindən verilmiş əmrlər aid edilib. Bura həmçinin, kolxoz üzvlərinin ümumi yığıncağının və ya müvəkkillərinin yığıncağının qərarı da daxildir. Eyni zamanda, sovxozların yenidən təşkili qaydasında onun bazasında yaradılaraq dövlət orqanlarının tabeliyində olan kənd təsərrüfatı müəssisələrinin rəhbərinin (direktor və s.) əmrləri də aiddir. Fərmanda qeyd olunub ki, vaxtilə sovxoz rəhbəri tərəfindən verilmiş əmr həmin sovxozun tabe olduğu hazırki orqanda və ya dövlət arxivində saxlanılan arxiv məlumatları ilə eynilik təşkil etdiyi halda müvafiq torpaq sahəsinə çıxarış verilir. Eyniliyin müəyyən olunması üçün qeydiyyat orqanının və ya mülkiyyətçinin sorğusuna cavab verilməsi müddəti 10 gün müəyyən edilib. Həmçinin, çıxarışın verilməsi üçün torpaq sahəsinin yerini müəyyənləşdirməyə imkan verən digər sənədlərin də təqdim olunması fərmanda göstərilib. Bura müvafiq sxem, plan, torpağın təhkim aktı kimi sənədlər, yaxud həmin torpaq sahəsində inşa edilmiş tikiliyə dair sənədlər aiddir.
Qeyd edək ki, dövlət başçısının son fərmanı ilə daşınmaz əmlakın qeydiyyatı ilə bağlı hüquqi təminat və qanunvericilik bazası daha da təkmilləşdirilib. Bu fərman daşınmaz əmlakın qeydiyyatı zamanı tələb olunan sənədlərin siyahısını artırmaqla qeydiyyat prosesinin daha geniş hüquqi dairəni əhatə etməsini təmin edib. Eyni zamanda, daşınmaz əmlakın qeydiyyatının sosial əhəmiyyətini bir daha artırıb, ölkə üzrə hüquqi baxımdan təhlükəsiz və etibarlı daşınmaz əmlak sahiblərinin sayının artmasına təkan verib. Bu tədbirlər daşınmaz əmlakın qeydiyyatının sadələşməsinə, daha çevik və rahat qeydiyyat aparılmasına səbəb olub.
 

Tags:  Əmlak Məsələləri Dövlət Komitəsi mobil ofislər vasitəsilə yerlərdə fərmanın icrasına başlayıb


RƏYLƏR


Top news