Ötən axşam Şəkidə yol qəzası baş verib. Qaraməryəm-İsmayıllı-Şəki magistiral yolunda Şəkinin "Qırxbulaq" adlanan ərazisində qeydə alınan hadisədə iki nəfər xəsarət alıb.
Milli.Az Kanal S-ə (Region TV) istinadən xəbər verir ki, Şəkinin Aşağı Daşağıl kənd sakini, 1940-cı il təvəllüdlü Həmzə Saleh oğlu Salmanovun idarə etdiyi "VAZ 21074" markalı minik avtomobili yolun kənarındakı ağaca çırpılıb. Qəzada xəsarət alan sürücü və avtomobildə olan sərnişin, rayonun Aşağı Daşağıl kənd sakini, 1987-ci il təvəllüdlü Taleh Nakif oğlu Məsimov Şəki Rayon Mərkəzi Xəstəxanasına aparılıblar.
Xəstəxanadan verilən məlumata görə, qapalı kəllə-beyin travması alan Talehin vəziyyəti ağır olduğundan müalicəsinin davamı üçün paytaxt xəstəxanalarından birinə göndərilib. Həmzə Salmanovun isə xəsarətləri yüngül olduğundan ambulator müalicə almaq üçün evə buraxılıb.
Faktla bağlı DİN-nin Baş Dövlət Yol Polisi İdarəsinin İstintaq və Təhqiqat Bölməsində araşdırma aparılır.
Milli.Az