Biz kimin tərəfindəyik?

Biz kimin tərəfindəyik?
07:47 7 Dekabr 2015
22 Ölkə
Ölkə mətbuatı
A- A+

Azərbycanın başqa bir şansı barədə. Tutaq ki, Rusiya "Türk axını" layihəsini bir tərəfli dayandırdı. Məgər biz həmişə bu layihənin TAP və TANAP kimi layihələrimizə əngəl, rəqib ola biləcəyindən narahat deyildik. Əlbəttə müttəfiqlərimizin niyyətlərinin baş tutmamasına sevinmək yaxşı görünmür. Amma təsəvvür edək ki, bu qarşıdurmadan Ermənistan udaydı. Bu yaxşı olardı? Yox əlbəttə. Rusiya da Türkiyə də dəfələrlə bəyan edib ki, onlar Azərbaycanın qüdrətli olmasını arzu edirlər. Deməli təsadüfə yaranmış şərait də buna işləyir. 

İki müttəfiqimiz arasında yaranmış yeni münasibətlərin Azərbaycana başqa bir gözlənilməz hədiyyəsi ....qərənfillərdir... Qəribə səslənsə də, məhz qərənfillər. Rusiyanın Türkiyədən gətrilməsinə qadağa qoyduğu mal və məhsullar arasında qərənfillər də var. 

İlk baxışda bəlkə də rabitəsizcəsinə yerinə düşməyən qərənfillərin əslində əsl yeri var. Gəlin təəssüflə də olsa xatırlayaq: Biz bir vaxtlar dünyanın 3-də birini, nəhəng Sovet İttifaqının qərənfil bazarını əlimizdə saxlayırdıq. Özü də kim edirdi bunu, bilirsiniz? Əsasən Nardaran. Camaatın başı iqtisadiyyatdan kənar məsələlərə qarışandan sonra Nardaran bu vəziyyətə düşdü.

25-30 il əvvəl Bakının ən varlı camaatı sayılan nardaranlıların indi adicə qaz və işıq pulu verməyə pulu yoxdur. Əziz qardaşlar, zəhmətkeş naradaran əhli, vaxtıdır. Əsl məqamdır. Qərənfillərin Rusiyada nə qədər populyar olduğunu xatırlayın. Elə indi tərpənək. Bu saat başlasaq "vosmoy marta" çatdırarıq. Rusiya bazarlarında qərənfillərmizin yeri görünür. 

Bu saat belə bir sual dəbdədir. Kimin tərəfindəsiz? Lap uşaqların, Brüs Li vurar Şaka? - sualına bənzəyir. Uşaq suallarıdır. Bir az böyüyək. Gəlin sadəcə maraqlardan danışaq. Dövlət və millət maraqlarından. Razılaşaq ki, məcbur düşdüyümüz vəziyyətdən təsadüfən Azərbaycan udur. Rusiyanın qadağasından sonra Türkiyədə böyük miqdarda kənd təsərrüfatı məhsulu yığılıb qalıb. Və bu artıq qiymətlərə öz təsirini göstərib. 

İki, bəzi sahələr üzrə isə iki dəfədən artıq ucuzlaşma var. Türkiyə itehsalçısının sevincinə şərik olmaq olar. Bəs nə? Birdən birə bazarda ucuzluqdur! Amma istehsalçını da başa düşməyə çalışaq. O əlində qalan məhsulu korlamamaq üçün əlverişli qiymətə satmalıdır. Deməli bu nəhəng həcm Azərbaycana gələ bilər. Bu isə təbii ki, burda da qiymətləri aşağı salacaq. Day alıcıya nə lazımdır. Amma burda da dövlət qurumları ehtiyatlı tərpənməlidir. Çünki bu baş verəcəyi təqdirdə Azərbaycan fermeri itirəcək. Daxili bazarı qorumaq üçün təcili tədbirlər də görmək lazımdır. Məsələn, elə rüsumlar tətbiq etməliyik ki, istehsalçını qoruya bilək. 

Və nəhayət unutmayaq ki, bizim həll olunmamış Qarabağ problemimiz var. Burda Azərbaycanın mövqeyi praqmatik və reallığa əsaslanan olmalıdır. Problemə rəsmi tərəfdən yanaşsaq qardaşımız Türkiyə nə Minsk qrupunun həmsədridir, nə də danışıqlarda iştirak edir. Yəni Türkiyənin Qarabağ münaqişəsinə rəsmən heç bir dəxli yoxdur. 

Rusiya isə ATƏT-in Minsk qrupunun həmsədridir və yeri gəlmişkən, bu yaxınlarda yeni təkliflər verib və xarici işlər naziri də bu barədə danışmışdı. Amma eyni zamanda da bu da var ki, Azərbycanın Türkiyə ilə hərbi əməkdaşlıq və qarşılıqlı yardım haqqında müqaviləsi var. Rusiya ilə belə bir razılaşmamız yoxdur. Bu reallıq da göstərir ki, biz kimin tərəfindəyik. Bu saat Azərbaycanın unikal mövqeyi var. O müdrik davranmalıdır. İlham Əliyev kimi. Nə Rusiyaya irad tutmamalıyıq ki, Türkiyənin sərhəddini niyə pozur, nə də Ərdoğana deməliyik ki, niyə təyyarəni vurur. Azərbaycan baş vermiş hadisədən yalnız məyus ola bilər və məyusdur. Hər iki dövlət dost və qardaşımızdır. Deməli təbii bir vasitəçilik missiyamız var. Azərbaycan təmkinli barışıq siyasəti irəli sürmək və vasitəçi rolunu oynamaqla bu prosesdən böyük uduşla çıxa bilər. Bunu hətta Ermənistanda da başa düşürər. 

Məşhur Erməni politoloq Aleksandr İskanderyanın cavabı bu baxımdan gerçəkliyi əks etdirir. "Azərbaycan komplimentar siyasətini davam etdirəcək. O həm Rusiyadan, həm də Türkiyədən ciddi surətdə asılıdır. Azərbaycan öz münasibətlərini bu dövlətlərin heç biri ilə korlamaq istəməyəcək. Bunu Rusiya da, Türkiyə də başa düşür. Ona görə də Azərbaycan pauza götürəcək və bu iki nəhəng qaya arasından ehtiyatla keçəcək. Bu mövqe Azərbaycan üçün ən rasional yoldur". Düşmən dövlətin təmsilçisi olanda nə olar, adam doğru düşünür.

Deməli uşaq sevincəkliyi, hay-haray lazım deyil. Odun üstünə su səpməliyik. İki dövlətdir, bu gün küsüblər, sabah barışacaqlar. Gəlin bunu faciə kimi qəbul etməyək. Biz burda özümüzü yuyulmamış çömçə kimi ortaya atmalı deyilik. Azərbaycan müstəqil dövlətdir və onun öz siyasi kursu var. 

Məsələn, Türkiyə Kosovanı tanıyır. Azərbycan Kosovanı tanımır. Rusiya Abxaziya və Osetiyanı tanıyır, Azərbaycan tanımır. Bu bir müstəqlil dövlətin anlaşılan siyasətdir. Məgər biz Kosovanı tanımayanda Türkiyə ilə düşmən olduq ki? Azərbaycanın dövlət kursu belədir ki, o birmənalı şəkildə separtçı qurumları tanıya bilməz. Həmişə belə olub. Biz Türkiyə ilə bir millət iki dövlətik. Düzdür. Amma iki dövlətik. İki ayrı dövlət. İki müstəqil dövlət və onların mövqeləri üst-üst düşməyə bilər. 

Bütün bu sadaladıqlarımızdan sonra bir daha özümüzə gəlin bu sualı verək: Biz kimin tərəfindəyik? Bizim cavabımız belədir. Azərbaycanın tərəfində. Azərbaycan Azərbycanın tərəfindədi.

Mir Şahin
Hesabat


Xəbərin orijinal ünvanı: http://news.milli.az/politics/388194.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR