Aktual mövzular: Dollar alış-satışı , Barselona - Real, Hava haqqında, Məzənnə, Neftin qiyməti

Ədliyyə orqanlarına qəbulla bağlı növbəti test imtahanı gələn həftə keçiriləcək

Ədliyyə orqanlarına qəbulla bağlı növbəti test imtahanı gələn həftə keçiriləcək

Date: 7 December 2015 17:43

Bakı. Trend:

Ədliyyə orqanlarına qulluğa qəbulla bağlı elan olunmuş növbəti açıq müsabiqə üzrə ərizələrin qəbulu başa çatıb.

Ədliyyə Nazirliyinin mətbuat xidmətindən Trend-ə verilən məlumata görə, müraciət etmiş namizədlərlə test imtahanı Tələbə Qəbulu üzrə Dövlət Komissiyası ilə birlikdə aşkarlıq şəraitində dekabrın 19-da saat 12:00-da vahid auditoriyada - Bakı İdman Zalında (Bakı şəhəri, Neftçilər prospekti, 26A ünvanında) keçiriləcək.

Namizədlər "İmtahana buraxılış vərəqəsi"ni 17-18 dekabr tarixlərində saat 09:00-dan 18:00-dək şəxsiyyət vəsiqəsini təqdim etməklə Ədliyyə Nazirliyinin inzibati binasından götürməlidirlər. Buraxılış rejiminin və yerləşdirilmənin təmin olunması üçün namizədlər imtahanın başlanmasına azı 1 saat qalmış gəlməli, buraxılış vərəqəsini və şəxsiyyət vəsiqəsini mütləq təqdim etməlidirlər. Göstərilən sənədlərdən biri olmadıqda namizəd imtahana buraxılmır.

İmtahanın keçiriləcəyi yer üzrə naviqasiya məlumatları, həmçinin test imtahanı və söhbət mərhələsində sualların hazırlanmasında istifadə olunan normativ hüquqi aktlara dair xülasə və "Yaddaş kitabçası" Nazirliyin internet səhifəsində yerləşdirilib, eləcə də bu sənədlər Nazirliyə və regional ədliyyə şöbələrinə (ünvanlar həmin internet səhifəsində göstərilmişdir) müraciət edənlərə təqdim olunur.

Eyni zamanda bir daha müsabiqədə iştirak edən hüquqşünasların nəzərinə çatdırılır ki, imtahanlara mükəmməl hazırlaşmalarına köməklik məqsədilə Ədliyyə Akademiyasında (Bakı şəhəri, Vidadi küçəsi, 158 ünvanında) xüsusi proqram əsasında təşkil olunmuş hazırlıq kursu davam edir.

Xatırladaq ki, qaydalara əsasən test imtahanının yekununa görə 55 və daha artıq bal toplamış namizədlər uğur qazanmış hesab olunur. Həmin namizədlərin zəruri sənədlərinin toplanması və yoxlanılması bu mərhələdən sonra həyata keçiriləcək və qanunvericiliklə müəyyən edilmiş bütün tələblərə cavab verən şəxslər ikinci mərhələyə - söhbətə buraxılacaqlar.

Bizi Twitter-dən izləyin: @trend_az


Tags:  Ədliyyə orqanlarına qəbulla bağlı növbəti test imtahanı gələn həftə keçiriləcək


RƏYLƏR


Top news