Bakı, 8 dekabr, Nihad Budaqov, AZƏRTAC
İndoneziya 7 ildən sonra yenidən Neft İxrac edən Ölkələr Təşkilatının (OPEC) tamhüquqlu üzvü olub.
AZƏRTAC Anadolu agentliyinə istinadla xəbər verir ki, İndoneziya 2008-ci ildə çıxdığı OPEC-ə yenidən üzv qəbul edilib.
İndoneziyanın yerli xəbər portalı “Jakarta Globe”da yer alan xəbərə görə, İndoneziyanın energetika və mineral ehtiyatlar naziri Sudirman Səid ölkəsinin yenidən OPEC-ə üzv olmasının neft ixrac edən digər ölkələrlə əlaqələr genişlənməsinə müsbət təsir edəcəyini deyib. OPEC-ə üzv ölkələrlə məlumat və təcrübə mübadiləsinin İndoneziyanın, o cümlədən də digər ölkələrin xeyrinə olacağını bildirən S.Səid deyib: “İndoneziyanın yenidən OPEC-ə üzv olmasının ölkə iqtisadiyyatına müsbət təsir edəcəyinə ümid edirəm”.
1960-ci ildə yaradılan OPEC-ə İndoneziya 1962-ci ildə ilk Asiya ölkəsi olaraq qəbul edilmişdi. 2008-ci ildə isə bu ölkədə neft və təbii qaz sahəsinə investisiyaların azalması nəticəsində neft hasilatı aşağı düşdüyü üçün İndoneziya OPEC-ə üzvlükdən çıxmışdı.
