Aktual mövzular: Dollar alış-satışı , Hava haqqında, Məzənnə, Neftin qiyməti

Ehtiyacımıza vur-tut 5 manat artım

Ehtiyacımıza vur-tut 5 manat artım

Date: 8 December 2015 21:37

Azərbaycanda 2016-cı il üçün yaşayış minimumu müəyyən edilib.

Milli.Az anspress-ə istinadən bildirir ki, yaşayış minimumu ölkə üzrə 136 manat, əmək qabiliyyətli əhali üçün 146 manat, pensiyaçılar üçün 115 manat, uşaqlar üçün 117 manat məbləğində müəyyən edilib.

2015-ci ildə yaşayış minimumu ölkə üzrə 131 manat, əmək qabiliyyətli əhali üçün 140 manat, pensiyaçılar üçün 108 manat, uşaqlar üçün isə 108 manat idi.

İqtisadi və Sosial İnkişaf Mərkəzinin (İSİM) rəhbəri, iqtisadiyyat doktoru Vüqar Bayramov ANS PRESS-ə açıqlamasında bildirib ki, Azərbaycan MDB (Müstəqil Dövlətlər Birliyi) ölkələri ilə müqayisədə həm orta pensiya məbləğinə, həm də yaşayış minimumunun həcminə görə ilk üçlüyə daxildir.

"Ümumiyyətlə, Rusiya, Azərbaycan və Qazaxıstan yaşayış minimumuna görə MDB ölkələri içərisində aparıcı mövqeyə malikdir", - deyə o əlavə edib.

Bununla belə, o həmçinin qeyd edib ki, son dövrlərdə xərclərin strukturu dəyişib və əmək qabiliyyətli əhali daha çox xərcləmələr etməyə məcburdur. 

Bu səbəbdən də Azərbaycanda yaşayış minimumu artırılmalıdır. Məsələn, Rusiyada rublun devalvasiyasına baxmayaraq, yaşayış minimumu yüksək olaraq qalır. 

Ümumiyyətlə, yaşayış minimumu yoxsulluğun səviyyəsinin müəyyənləşdirilməsi baxımından əhəmiyyətlidir. Gəliri az olan əhalinin ehtiyacları dövlət tərəfindən kompensasiya edilməlidir.

Bu isə büdcə xərclərini və büdcədən ayrılan vəsaiti müəyyən edib prezidentə təqdim edərkən dövlət qurumlarının daha diqqətli olmağını tələb edir. Çünki bir çox yoxlamalar zamanı bir sıra dövlət qurumlarında büdcə vəsaitlərinin ehtiyacdan artıq xərcləndiyi aşkar olunduğu halda, son dövrlərdə əhali arasında sosial problemlər, maddi çətinliklər səbəbindən cinayət hadisələrinin, intiharların, əhali arasında narazılığın artdığı müşahidə edilir.

Məsələn, bu yaxınlarda Hesablama Palatası Dövlət Statistika Komitəsində apardığı yoxlamalar zamanı büdcədən quruma ayrılan vəsaitin xərclənməsində nöqsanlar aşkarlayıb.

Komitə podratçı təşkilatlara əlavə vəsaitin ödənilməsinə imkan yaradıb, beynəlxalq tədbirlərin keçirilməsi, ezamiyyət xərclərinin ödənilməsi zamanı artıq xərclərə yol verib. 

Bundan başqa, bir sıra elektron xidmət və vasitələrlə təchiz edildiyi halda blanklar, məcmuələr, müxtəlif materiallar və s. çap işləri həyata keçirilməklə büdcə vəsaitlərindən səmərəsiz istifadə olunmasına şərait yaradıb.

Bir sözlə, hazırda neftin qiymətinin aşağı olduğu bir vaxtda kəskin xərclərə getmək mümkün deyil. Amma istənilən halda yaşayış minimumu mərhələli şəkildə olsa belə artırılmalıdır. Çünki qiymətlərdə artım var. Əmək və Əhalinin Sosial Müdafiəsi Nazirliyi və Maliyyə Nazirliyi də yaşayış minimumunu müəyyən edərkən bunu nəzərə almalıdır.
Milli.Az


Tags:  Ehtiyacımıza vur-tut manat artım


RƏYLƏR


Top news