Aktual mövzular: Dollar alış-satışı , Barselona - Real, Hava haqqında, Məzənnə, Neftin qiyməti

Zaqatalada xüsusi amansızlıqla cinayət törətmiş şəxslər həbs olunublar

Date: 10 December 2015 12:08


Bakı, 10 dekabr, AZƏRTAC
Xəbər verildiyi kimi, noyabrın 28-də Zaqatala rayon sakini Vüsal Bəşirovun həmkəndliləri tərəfindən qəsdən öldürülməsinə cəhd faktına görə rayon prokurorluğunda cinayət işi başlanıb, hadisə yerinə baxış keçirilib, cinayətin aləti olan balta maddi sübut kimi götürülüb, iş üzrə müvafiq ekspertizalar təyin edilib və digər zəruri istintaq-əməliyyat hərəkətləri həyata keçirilib.
Bu barədə Respublika Baş Prokurorluğu və Daxili İşlər Nazirliyinin mətbuat xidmətlərindən AZƏRTAC-a məlumat verilib.
Məlumatda deyilir ki, həmin tarixdə rayondakı dini təriqətlərdən birinə mənsub olan sakinləri Rəşad Tahirov və Araz Musayev aralarında əldə edilmiş razılığa əsasən həmyerliləri Vüsal Bəşirovu şəriət qanunları ilə cəzalandırmaq üçün əvvəlcədən balta alıb ağzını itilədərək özlərinə məxsus mağazada gizlətmiş, sonra onunla görüşüb kirayədə yaşadıqları evə aparmış, Araz Musayevə olan borcunu vaxtında qaytarmadığına görə döyüb, əllərini, ayaqlarını və ağzını yapışqanlı lentlə bağlayaraq tanışları Akif Mustafayevin idarə etdiyi minik avtomobili ilə şəhərin “Asma körpü” deyilən ərazisinə aparmaqla bir neçə saat qanunsuz azadlıqdan məhrum etmişlər. İstintaq araşdırmaları ilə, həmçinin R.Tahirovun qəsdən öldürmək məqsədi ilə V.Bəşirovun ayaqlarını tutması, A.Musayevin isə dizlərini onun çiyin nahiyəsinə qoyub özü ilə gətirdiyi balta ilə xüsusi amansızlıqla Vüsalın hər iki əlini bilək nahiyəsindən kəsməsi və qanitirmədən ölə biləcəyinə əmin olduqdan sonra zərərçəkmişi əlləri və ayaqları bağlı vəziyyətdə qoyaraq hadisə yerindən qaçmalarına dair kifayət qədər sübutlar toplanıb.
Araz Musayev rayon Polis Şöbəsinə gedərək təslim olub, Rəşad Tahirov və Akif Mustafayev isə istintaqdan gizləniblər. Polis və prokurorluq əməkdaşları tərəfindən həyata keçirilmiş təxirəsalınmaz istintaq və əməliyyat-axtarış tədbirləri nəticəsində R.Tahirov və A.Mustafayev də tutularaq istintaqa cəlb ediliblər.
Rəşad Tahirova Cinayət Məcəlləsinin 145.2.4-cü (qanunsuz azadlıqdan məhrum etmə), 29,120.2.1-ci, 29,120.2.2-ci və 29,120.2.4-cü (qabaqcadan əlbir olan bir qrup şəxs tərəfindən xuliqanlıq niyyəti ilə xüsusi amansızlıqla qəsdən adam öldürməyə cəhd), Araz Musayevə 29,120.2.1-ci, 29,120.2.2-ci və 29,120.2.4-cü maddələri, Akif Mustafayevə isə 145.2.4-cü maddələri ilə ittiham elan edilərək barələrində rayon məhkəməsinin qərarları ilə həbs qətimkan tədbiri seçilib.
Hazırda iş üzrə zəruri istintaq tədbirləri davam etdirilir.

Tags:  Zaqatalada xüsusi amansızlıqla cinayət törətmiş şəxslər həbs olunublar


RƏYLƏR


Top news