Aktual mövzular: Dollar alış-satışı , Barselona - Real, Hava haqqında, Məzənnə, Neftin qiyməti

Vakant dövlət qulluğu vəzifələrinin tutulması üçün yeni ümumi müsahibə elan edilir

Vakant dövlət qulluğu vəzifələrinin tutulması üçün yeni ümumi müsahibə elan edilir

Date: 10 December 2015 17:33


Bakı, 10 dekabr, AZƏRTAC 
Azərbaycan Respublikasının Prezidenti yanında Dövlət Qulluğu Məsələləri üzrə Komissiya (DQMK) dekabrın 10-da altı dövlət orqanında inzibati vəzifələrin beşinci-yeddinci təsnifatlarına uyğun olan 34 vakant dövlət qulluğu vəzifəsinin tutulması üçün ümumi müsahibə (mərkəzi icra hakimiyyəti və məhkəmə orqanları üzrə) elan edir.
Komissiyadan AZƏRTAC-a bildiriblər ki, ümumi müsahibəyə çıxarılan vakant dövlət qulluğu vəzifələrindən 32-si mərkəzi icra hakimiyyəti orqanlarının aparatlarında və yerli təşkilatlarında, 2-si isə məhkəmə orqanlarındadır.
Ümumi müsahibədə vakant vəzifəni təqdim etmiş dövlət orqanında və ya digər dövlət orqanında inzibati vəzifələrdə çalışan dövlət qulluqçuları (qeyd edilən şəxslərin inzibati vəzifələrə uyğun ixtisas dərəcəsi olmalıdır), dövlət qulluğunda inzibati vəzifələrdə azı 5 il çalışmış şəxslər iştirak edə bilərlər.
Ümumi müsahibədə iştirak etmək üçün sənədlərin qəbulu dekabrın 10-dan 29-dək saat 18:00-dək DQMK tərəfindən aparılacaq. Sənədlər şəxsən, yaxud poçt vasitəsilə təqdim edilə bilər.
Ümumi müsahibəyə dair ətraflı məlumat “Respublika” qəzetinin 10 dekabr nömrəsində dərc edilib və həmin tarixdən Komissiyanın rəsmi internet saytında (www.csc.gov.az) yerləşdirilib.
Həmçinin bildirilib ki, bu il noyabrın 3-də Dövlət Qulluğu Məsələləri üzrə Komissiya tərəfindən 3 dövlət orqanında inzibati vəzifələrin beşinci və altıncı təsnifatlarına uyğun olan 19 vakant dövlət qulluğu vəzifəsinin tutulması üçün elan edilmiş müsabiqə üzrə namizədlərin qeydə alınması dekabrın 2-də başa çatıb.
Müsabiqə üzrə 1278 namizəd qeydiyyatdan keçib.
Ən çox namizədin qeydə alındığı dövlət orqanı Alternativ və Bərpa Olunan Enerji Mənbələri üzrə Dövlət Agentliyi (1051 nəfər) olub.
Test imtahanlarının keçirilmə tarixi və yeri Komissiyanın rəsmi internet saytında “Test imtahanlarının qrafiki” bölməsində (www.csc.gov.az) yerləşdirilib. Qrafikdə namizədlər iddia etdikləri dövlət orqanlarının inzibati vəzifələri üzrə nəzərdə tutulmuş test imtahanı tarixini və vaxtını aktiv etməklə öz adlarını tapa bilərlər. Komissiyada mobil telefon nömrəsi və elektron poçt ünvanı qeydə alınmış namizədlərə test imtahanının keçirilmə vaxtı barədə qısa SMS və elektron məktub göndərilib.
Test imtahanının kompyuter vasitəsilə keçirilməsini təmin etmək məqsədilə Komissiya tərəfindən hazırlanmış “Dövlət qulluğuna qəbul - Test imtahanı” sistemi haqqında məlumatın videotəqdimatı ilə namizədlər DQMK-nın rəsmi internet saytında ətraflı tanış ola bilərlər.
Test tapşırıqlarının hazırlanması üçün tərtib edilən ümumiləşdirilmiş proqramlar və metodiki vəsait Komissiyanın rəsmi internet saytında yerləşdirilib. İmtahan zamanı test tapşırıqları bu proqramlar çərçivəsində olacaq.

Tags:  Vakant dövlət qulluğu vəzifələrinin tutulması yeni ümumi müsahibə elan edilir


RƏYLƏR


Top news