Aktual mövzular: Dollar alış-satışı , Hava haqqında, Qarabağ, Qəbələ, Məzənnə, Neftin qiyməti

Səfər Əbiyevin müavini işinə baxan hakimlərin dəyişdirilməsini istəyir

Səfər Əbiyevin müavini işinə baxan hakimlərin dəyişdirilməsini istəyir

Date: 11 December 2015 13:39

 

 

Bu gün Bakı Ağır Cinayətlər Məhkəməsində sabiq müdafiə naziri Səfər Əbiyevin müavini Mehman Səlimovun cinayət işi üzrə məhkəmə prosesi davam edib.

 

Lent.az-ın məlumatına görə, prosesdə hakim Zeynal Ağayev bildirib ki, cinayət işində adı olan iki şahid Naxçıvanda olduqları üçün məhkəməyə gələ bilməyəcək. Müdafiə tərəfinin vəkilləri də, Mehman Səlimov da buna etiraz edib. Sabiq nazir müavini həmin şəxslərin ittiham tərəfinin şahidləri olduğunu bildirib: "Həmin şəxslər mənim əleyhimə ifadə verib. Yeri gəlsə, onları mən Naxçıvandan gətizdirərəm. Onların məhkəmədə dindirilməsini istəyirəm".

 

Mehman Səlimovun vəkili Ağaveys Şahverdi qısa çıxış edib: "Adı keçən şahidlər məhkəməyə gəlmirsə, onların ifadələri də sübutlar siyahısından çıxarılmalıdır. Gəlib məhkəmədə ifadə versinlər. Onların ifadəsinin elan olunmasına razı deyilik. Ötən prosesdə də şahidlərdən Rauf Aşurov istintaqa verdiyi ifadəsindən imtina edib".

 

Məhkəmə yerində müşavirə edərək, həmin şahidlərin məcburi gətirilməsi ilə bağlı qərar qəbul edib.

 

Bundan sonra Mehman Səlimovun vəkilləri vəsatətlərlə çıxış edib. Onlar Mehman Səlimovun rəhbəri olduğu "STJ" MMC-nin həyata keçirdiyi lahiyələrlə bağlı yeni ekspertizanın təyin olunması istəyiblər. Vəsatət baxılmamış saxlanılıb.

 

Vəkillər 2-ci vəsatətlərində Mehman Səlimov həbs olunduqdan sonra onun yarımçıq qalan işlərini davam etdirən podratçı şirkətlərin rəhbərlərinin əlavə şahid qismində məhkəməyə dəvət olunmasını istəyiblər. Bu vəsatətdə baxılmamış saxlanılıb.

 

Vəkil Ağayevs Şahverdi bu qərara etiraz edib: "Bizim vəsatələrin hamısını baxılmamış saxlayırsınız. Araşdırmırsınız. Belə olmaz. İttiham tərəfinin bütün istəkləri yerinə yetirilir. Amma bizə gələndə baxılmamış saxlayırsınız. Ümumlikdə baxılmamış saxlamaq kimi anlayış yoxdur, ya rədd eləyin, ya da əmin edin. İşin ədalətli araşdırılmasını istəyirsinizsə, təmin edin, araşdıraq".

 

Vəkil hakimlər kollegiyasına etiraz edəcəklərini də bildirib: "Biz məsləhətləşib, gələn proses sizə etiraz edəcəyik. Bu cür cinayət işinə baxılmır".

 

Məhkəmə prosesi dekabrın 18-də davam edəcək.

 

Qeyd edək ki, M. Səlimov Cinayət Məcəlləsinin 179.3.2-ci (mənimsəmə - külli miqdarda törədildikdə) və 308.2-ci (vəzifə səlahiyyətlərindən sui-istifadə etmə) maddələri ilə təqsirləndirilir.

 

M. Səlimov 1995-99-cu illərdə Azərbaycan müdafiə nazirinin siyasi və ictimai işlər üzrə müavini olub.


Tags:  Səfər Əbiyevin müavini işinə baxan hakimlərin dəyişdirilməsini istəyir

RƏYLƏR


Top news