Quba, 14 dekabr, Elxan Yusifli, AZƏRTAC
Quba rayonunun bir sıra dağlıq yaşayış məntəqələrində avtomobil yolları yenidən qurulur.
AZƏRTAC xəbər verir ki, altı min nəfər əhalinin yaşadığı 12 yaşayış məntəqəsini birləşdirən Rustov-Xanəgah-Gürdəh, Rustov-Nöydün-Şuduq, Rustov-Məckəxacə, Rustov-Bağçalı-Yekdar avtomobil yollarının tikintisi hazırda davam edir. Yolların inşasına 2015-ci ilin avqust ayından başlanılıb. Yeni salınacaq dörd avtomobil yolunun uzunluğu ümumilikdə 30 kilometr təşkil edir.
15 kilometr uzunluğundakı Rustov-Xanəgah-Gürdəh avtomobil yolunun üçdəbir hissəsinə beş santimetr qalınlığında asfalt döşənib. Bununla yanaşı, yolun 6 kilometrində torpaq yatağı bərkidilib, genişləndirmə işləri aparılıb. Bu yoldan 5 kəndin sakinləri istifadə edəcək. Yolun dağlıq və meşəlik ərazilərindən keçməsi yeni turizm marşrutlarının açılmasına da şərait yaradacaq.
12 yaşayış məntəqəsini birləşdirən Rustov-Xanəgah-Gürdəh, Rustov-Nöydün-Şuduq, Rustov-Məckəxacə, Rustov-Bağçalı-Yekdar avtomobil yollarının tikintisi üçün dövlətimizin başçısının Sərəncamına əsasən ümumilikdə 14 milyon manat vəsait ayrılıb.
