Aktual mövzular: Dollar alış-satışı , Hava haqqında, Məzənnə, Neftin qiyməti

Şahbaz Quliyev: "Anamdan nigaranam"

Şahbaz Quliyev: "Anamdan nigaranam"

Date: 14 December 2015 15:36

Beynəlxalq Qızıl Xaç Komitəsinin (BQXK) əməkdaşları Kəlbəcərdə ermənilər tərəfindən girov götürülən azərbaycanlılardan ailələrinə məktub gətirib.

ANS PRESS-in məlumatına görə, Şahbaz Quliyevin ailəsi məktubu bu gün alıb. Girovun bacısı İradə Quliyevanın sözlərinə görə, məktub bir həftəyə yaxındır ki göndərilsə də, o bir neçə saat olar ki, ailəyə çatdırılıb.

"Qardaşım yazır ki, vəziyyəti yaxşıdır. Ona isti paltar aparıblar, məktubda başqa heç nəyin ona çatdırılmasından danışmır. Bir də əsas anasını soruşur. Deyir ki, anam haqqında heç vaxt mənə yazmırsınız, ondan nigaranam", - deyə İradə xanım vurğuladı.

Müsahibəsi zamanı kövrələn bacı, qardaşının tezliklə qayıtmasını arzuladı. İradə xanım məktubda heç bir qaralamanın olmadığını dedi.



Ermənilər tərəfindən girov götürülən Dilqəm Əsgərovun ailəsi isə ondan gətirilən məktubu dekabrın 11-də alıb. Dilqəm Əsgərovun qardaşı Sahib Musayev məktubu şərh edərkən deyib:

"Dilqəm yazıb ki, ona dəyib-dolaşan yoxdur, salamatçılıqdır. Ona məktub ilə yanaşı isti paltar da göndərmişdik, geyimlər də çatıb. Bir də keçən dəfə məktubda bəzi ərzaqları istəmişdi. Onları da BQXK-nə tapşırdıq. Onlar da alıb aparıblar. Məktubda da sarımsaq, paxlava, çay, qənd çatdırıldığını yazıb. Bizə onun istədiklərini burdan alıb göndərməyə icazə verilmir. Ona görə də istədiklərini BQXK-sı özü alır", - deyə Sahib Musayev vurğulayıb.


Dilqəm Əsgərov


Girovun qardaşının sözlərinə görə, məktubun bir çox hissəsinin yazıları qaralanıb. O, deyib ki, uzun müddətdir ki, belə bir hal olmurdu.

Bu ilin dekabrın 4-də Beynəlxalq Qızıl Xaç Komitəsinin (BQXK) əməkdaşları Kəlbəcərdə ermənilər tərəfindən girov götürülən azərbaycanlılara baş çəkiblər.

Bu barədə BQXK-nın Azərbaycan nümayəndəliyinin İctimaiyyətlə əlaqələr şöbəsinin rəhbəri İlahə Hüseynova məlumat verib. "BQXK-nın nümayəndələri Dağlıq Qarabağda saxlanılan azərbaycanlılara ailə məlumatlarını çatdırıb, onlardan da ailələri üçün məlumat alınıb. Komitə mandatına uyğun olaraq baş çəkmələri davam etdirəcək", - deyə İlahə Hüseynova əlavə edib.

Dilqəm Əsgərov və Şahbaz Quliyev ötən ilin iyulunda girov götürülüb, dekabr ayında isə üzərində qondarma məhkəmə qurulub. Separatçı rejimin qərarı ilə qurulan oyuncaq məhkəmə Dilqəm Əsgərovu ömürlük, Ş.Quliyev isə 22 il müddətinə azadlıqdan məhrum edib. Hazırda onlar Şuşa həbsxanasında saxlanılırlar.


Dilqəm Əsgərov və Şahbaz Quliyev

Tags:  Şahbaz Quliyev Anamdan nigaranam


RƏYLƏR


Top news