Aktual mövzular: Dollar alış-satışı , Çempionlar Liqası, Hava haqqında, Məzənnə, Neftin qiyməti

Göyçayda görkəmli qəzəlxan Əliağa Vahidin 120 illik yubileyi qeyd olunub

Göyçayda görkəmli qəzəlxan Əliağa Vahidin 120 illik yubileyi qeyd olunub

Date: 15 December 2015 12:58


Göyçay, 15 dekabr, Şahnəzər Bəşirov, AZƏRTAC
Göyçay rayon Mərkəzi Kitabxanasında Azərbaycan ədəbiyyatının görkəmli nümayəndəsi, böyük şair Əliağa Vahidin 120 illik yubileyi ilə əlaqədər “Vahidəm, xəlqimin qəzəl şairiyəm” adlı tədbir təşkil olunub.
AZƏRTAC xəbər verir ki, tədbirdə rayon icra hakimiyyəti başçısının müavini Rəxşəndə Rəcəbova, rayon mədəniyyət və turizm şöbəsinin müdiri Sahib Şükürov, təhsil və mədəniyyət işçiləri, ziyalılar çıxış edərək Prezident İlham Əliyevin “Əliağa Vahidin 120 illik yubileyinin keçirilməsi haqqında” Sərəncam imzaladığını diqqətə çatdırıblar. Bildirilib ki, Sərəncama uyğun olaraq ölkəmizin hər yerində şairə həsr edilmiş silsilə tədbirlər təşkil olunur. Azərbaycan müstəqilliyini yenidən bərpa etdikdən sonra Əliağa Vahid yaradıcılığının tədqiqinə xüsusi diqqət yetirilib, şairin əsərləri çap olunub, haqqında çoxsaylı elmi məqalələr yazılıb.
Qeyd edilib ki, Əliağa Vahid hələ erkən yaşlarından Nizami Gəncəvi, İmadəddin Nəsimi, Məhəmməd Füzuli, Seyid Əzim Şirvani, Mirzə Ələkbər Sabir ənənələrini dərindən mənimsəyərək klassik sənətkarlar səviyyəsində qəzəllər yazıb. Onun yaradıcılığında satira, yumor və lirika vəhdət təşkil edir. Şeirlərinin əsas obrazları Vətən, sevgi, həyat, insanlardır. Yüksək obrazlılıq, fikri təsirli ifadə etmək bacarığı onun şeirlərinə əbədiyyət qazandırır. Məhz buna görə də ilk şeirlərini yazdığı dövrdən yüz ildən çox vaxt keçsə də, qəzəl ustadının əsərləri yaddaşlardan silinmir, dillərdə dolaşır.
Tədbir iştirakçıları Azərbaycan ədəbiyyatında Əliağa Vahidin xidmətlərindən söz açıb, onun ənənələrinin bu gün də davam etdirilməsindən danışıblar. Məktəblilər Məhəmməd Füzuli ənənələrinin davamçısı olan Əliağa Vahidin yaradıcılığından nümunələr səsləndiriblər. Yubiley tədbiri rayon mədəniyyət evinin və uşaq musiqi məktəbinin hazırladığı musiqili kompozisiya ilə başa çatıb.

Tags:  Göyçayda görkəmli qəzəlxan Əliağa Vahidin 120 illik yubileyi qeyd olunub


RƏYLƏR


Top news