Bakı, 16 dekabr, Nihad Budaqov, AZƏRTAC
“Günəşli” yatağının 10 nömrəli dərin dəniz özülündə yanan neft quyusunun biri tamamilə söndürülüb və quyunun ağzı bağlanıb. Hazırda təxminən 3-4 quyudakı yanğının lokallaşdırılması istiqamətində işlər intensiv davam etdirilir.
Bu barədə AZƏRTAC-a Azərbaycan Respublikası Dövlət Neft Şirkətinin (SOCAR) “Azneft” İstehsalat Birliyindən məlumat verilib. Bildirilib ki, “Boots&Coots” şirkətinin yanğının söndürülməsində iştirak etməsi üçün hazırlıq işləri demək olar ki, tamamlanmaq üzrədir. “Neft daşları” və “Günəşli” sahəsində itkin düşmüş ümumilikdə 26 neftçinin axtarışları isə davam etdirilir.