Bakı, 17 dekabr, AZƏRTAC
İraqın cənubunda naməlum yaraqlılar tərəfindən girov götürülən Qətər vətəndaşlarının 9-u azad edilib.
AZƏRTAC TASS informasiya agentliyinə istinadla xəbər verir ki, bir qədər əvvəl İraqın Mutanna əyalətinin qubernatoru Faleh əz-Ziyad yaraqlıların bölgəyə ov üçün gələn 26 Qətər vətəndaşını girov götürdüyünü bildirmişdi. İnsident Bağdaddan 280 kilometr cənub-qərbdə yerləşən Əs-Səmavə şəhəri yaxınlığında baş verib.
Vətəndaşlarının girov götürülməsini təsdiqləyən Qətərin Xarici İşlər Nazirliyi hadisənin təfərrüatları barədə məlumat verməyib. Yerli KİV-lər isə girovlar arasında Qətərin monarx ailəsinin üzvlərinin də olduğunu yazırlar.