Aktual mövzular: Dollar alış-satışı , Hava haqqında, Məzənnə, Neftin qiyməti

"İnter" UEFA-nın qəzəbinə niyə tuş gəlib? - TƏFƏRRÜATLAR

"İnter" UEFA-nın qəzəbinə niyə tuş gəlib? -   TƏFƏRRÜATLAR

Date: 17 December 2015 17:57

Bakının "İnter" klubu UEFA tərəfindən cəzalandırılıb. Belə ki, UEFA-nın Klublara Maliyyə Nəzarəti Orqanı tərəfindən aparılmış monitorinq zamanı məlum olub ki, “İnter” PİK Klubların Lisenziyalaşdırılması və Maliyyə Feyr-Pleyi Qaydaları"nın 66 və 66bis saylı maddələrinin tələblərini yerinə yetirməyib və klubun əməkdaşlara vaxtı ötmüş borcları mövcuddur.


Bunu nəzərə alaraq, UEFA-nın Klublara Maliyyə Nəzarəti Orqanı dekabrın 10-da keçirilmiş iclasda aşağıdakı qərarları qəbul edib:


1. “İnter” PİK növbəti 3 mövsüm ərzində (2016/17, 2017/18 və 2018/19) əldə etmiş idman nəticələrinə görə UEFA-nın klub yarışlarında iştirak etmək hüququ qazanarsa, 1 mövsüm ərzində bü hüquqdan məhrum olunur. Əgər klub 31 yanvaradək yaranmış borcların ödənilməsini təsdiq edən sənədləri UEFA-ya təqdim edərsə, bu cəza qüvvədən düşür.


2. “İnter” PİK 50 min avro məbləğində cərimə olunur.


3. “İnter” PİK bu işin aparılmasına sərf olunmuş 3 min avro məbləğində vəsaiti ödəməlidir.


4. Qeyd olunmuş cərimə və xərclər qərar kluba göndərildikdən sonra 30 gün ərzində ödənməlidir.


5. Klub qərarla razı olmadığı halda, İdman Arbitraj Məhkəməsinə apellyasiya şikayəti ilə müraciət edə bilər.


Məxfiliyi qorumaq məqsədilə klubun hansı futbolçulara borclu olduğu və borcun ümumi məbləği açıqlanmayıb. 


Lakin Qaynar.info-da olan məlumata görə, klubun sabiq vitse-prezidenti Roland Vromans, sabiq məşqçisi Marino Puşiç, sabiq futbolçusu Ruben Sxaken "İnter"dən 3 ayın (mart, aprel, may) pulunu ala bilmədiyi üçün şikayət ünvanlayıb. Xorvatiyalı Matiya Şpiçiç isə gözləmə mövqeyi tutduğunu, ancaq pulu verilməyəcəyi halda eyni addımı atacağını bildirib. Eləcə də digər legionerlərin şikayətcil olduğu şübhə doğurmur. Ümumiləşdirsək, bu 3 ay ərzində yığılan borc 1 milyon avroya çatır.


Əldə etdiyimiz məlumat onu da bildirir ki, UEFA-dan "İnter"ə ayrılmış 630 min avronun AFFA tərəfindən klubun hesabına köçürülməməsində də bu amil durur. Belə ki, "İnter" kimi cərimələnmiş Rumıniyanın "Tırqu-Mureş", "Astra", "Botoşani", Ukraynanın "Dnepr" və Portuqaliyanın "Braqa" klublarına da UEFA tərəfindən ayrılmış pul vəsaiti dondurulub, yəni həmin ölkələrin federasiyalarında saxlanılıb.


Təbii ki, "İnter"in ana sponsoru olan Beynəlxalq Bank sabiq rəhbəri Cahangir Hacıyevin dönəmindən qalan bu borclardan və UEFA-nın monitorinq aparmasından xəbərdardır. İlin sonunadək bu məsələnin yoluna qoyulacağı deyilsə də, inandırıcı səslənmir. Çünki bu dəqiqə Beynəlxalq Banka kredit pullarının geri qaytarılması yönündə daha çox iş aparılır, nəinki çıxarılması yönündə. 50 min cərimə + 3 min avro monitorinqə görə sərf olunmuş pulun ödənilməsi isə heç bir problemə çevrilməyəcək. Çünki bu pul "İnter"ə məxsus olan 630 min avrodan (təbii ki, AFFA-nın İslandiya səfərinə çəkdiyi xərclər çıxılmaqla - red.) çıxılacaq. Elə AFFA-nın Lisenziyalaşdırma Qrupunun rəhbəri Elçin Məmmədov da saytımıza bunu deyib: "Əgər klubla AFFA arasında razılaşma olarsa, bu pul ordan çıxıla bilər". Məmmədov onu da bildirib ki, UEFA-nın monitorinq aparmasına səbəb apreldə verilən maliyyə hesabatı zamanı "İnter"in futbolçular və ya klubda çalışan digər şəxslər önündə öhdəliklərini yerinə yetirə bilməməsinin aşkarlanmasıdır.


Onu da bildirək ki, "İnter" İsveçrənin Lozanna şəhərində yerləşən İdman Arbitraj Məhkəməsinə bu qərardan şikayət verməyəcək. Çünki klubda da bu qərarın haqlı olduğunu bilirlər. Üstəlik, növbəti instansiyaya müraciət əlavə xərcə səbəb olacaq, çıxarılacaq qərarın isə UEFA-nın lehinə, "İnter"in əleyhinə olacağı dəqiqdir.


Sonda onu da qeyd edək ki, UEFA-nın Klublara Maliyyə Nəzarəti Orqanının Araşdırma Palatası İv Letermin (Belçikanın sabiq baş naziri olub - red.) rəhbərliyi ilə 30 iyun-30 sentyabr aralığında "İnter"də təhqiqat aparıb. Sonuncu tarixdə "İnter"ə xəbərdarlıq edilsə də, klub ödənişləri etmək gücündə olmadığını bildirib. Nəticədə noyabrda elan olunub ki, "İnter" və yuxarıda adları çəkilən digər 5 klubun məsələsinə baxılıb yekun qərar çıxarılması haqda iş UEFA-nın Klublara Maliyyə Nəzarəti Orqanının Arbitraj Palatasına tapşırılıb. Arbitraj Palatası isə portuqaliyalı hüquqşünas Joze Narsisu da Kunya Rodriqeşin rəhbərliyi ilə "İnter"ə yuxarıdakı sanksiyaları tətbiq edib.


Fanat.az


Tags:  İnter UEFA-nın qəzəbinə niyə tuş gəlib TƏFƏRRÜATLAR


RƏYLƏR


Top news