Aktual mövzular: Dollar alış-satışı , Hava haqqında, Məzənnə, Neftin qiyməti

BDU-da professor Pənah Xəlilovun 90 illik yubileyinə həsr olunmuş konfrans keçirilib (FOTO)

BDU-da professor Pənah Xəlilovun 90 illik yubileyinə həsr olunmuş konfrans keçirilib (FOTO)

Date: 18 December 2015 16:03

Bakı. Trend:

Bakı Dövlət Universitetində (BDU) görkəmli ədəbiyyatşünas, tənqidçi və tərcüməçi, filologiya elmləri doktoru, professor Pənah Xəlilovun 90 illik yubileyinə həsr olunmuş Respublika elmi konfransı keçirilib.

BDU-nun Mətbuat və informasiya şöbəsindən Trend-ə verilən məlumata görə, konfransı giriş sözü ilə açan rektor, akademik Abel Məhərrəmov bildirib ki, P.Xəlilov 1948-ci ildə Bakı Dövlət Universitetinin filologiya fakültəsini bitirib və 70 ildir taleyini həmişəlik bu ali məktəblə bağlayıb. Rektorun sözlərindən məlum olub ki, P.Xəlilov elmi şuranın qərarı ilə universitetdə saxlanıb, aspiranturada təhsil alıb, 1951-ci ildə filologiya elmləri namizədi, 1969-cu ildə isə filologiya elmləri doktoru elmi adına layiq görülüb.

Akademik həmçinin bildirib ki, P.Xəlilovun Bakı Dövlət Universiteti qarşısında, dolayısilə Azərbaycan elmi, ədəbiyyatı və xalqı qarşısında müstəsna xidmətləri var. O, 1973-cü ildə BDU-nun filologiya fakültəsində açılan “SSRİ xalqları ədəbiyyatı” kafedrasının ilk müdiri seçilib. Sonralar adı “Türk xalqları ədəbiyyatı” kafedrasına dəyişdirilən bu kafedra üçün Pənah müəllim güclü potensiala malik alimlər seçib, bir qismini isə şəxsən özü yetişdirib. Onun rəhbərliyi altında 20 nəfərə yaxın elmlər namizədi, 5 elmlər doktoru dissertasiya müdafiə edib.

P. Xəlilovun ölkənin ümumtəhsil məktəbləri üçün bir sıra proqram və dərsliklərin hazırlanmasında yaxından iştirak etdiyini diqqətə çatdıran rektor onun akademik Məmməd Arif Dadaşzadə ilə birlikdə yazdığı “Ədəbiyyat” dərsliyi, professor Mir Cəlal Paşayevlə birlikdə qələmə aldığı “Ədəbiyyatşünaslığın əsasları” kitabı müxtəlif dövrlərdə dəfələrlə nəşr olunub. P.Xəlilovun ölkəmiz və elmimiz qarşısındakı mühüm xidmətlərinin dövlət tərəfindən layiqincə qiymətləndirildiyini deyən rektor onun “Əməkdar müəllim” adına layiq görüldüyünü, həm də Azərbaycan Respublikası Prezidentinin fərdi təqaüdçüsü olduğunu diqqətə çatdırıb.

Rektor çıxışının sonunda P.Xəlilovu “Gənc nəslin yetişdirilməsində göstərdiyi xüsusi xidmətlərinə, elmin, təhsilin inkiafındakı böyük roluna və anadan olmasının 90 illik yubileyi münasibətilə” Fəxri fərmala təltif edib. Eyni zamanda alimə təhsil sahəsində göstərdiyi xidmətlərə görə Təhsil Nazirliyinin “Azərbaycan Respublikasının qabaqcıl təhsil işçisi döş nişanı” təqdim edilib və M.V. Lomonosov adına Moskva Dövlət Universitetinin Bakı filialının rektoru, AMEA-nın müxbir üzvü Nərgiz Paşayevanın təbrik ünvanı oxunub.

Yubilyarın həyat və elmi yaradıcılığına həsr olunmuş film nümayişindən sonra filologiya fakültəsinin dekanı, dosent Məhərrəm Vəliyevin “Böyük alimin şərəfli həyat yolu” adlı məruzəsi dinlənilib.

Tədbirdə AMEA-nın müxbir üzvü Təhsin Mütəllibov, professorlar – Abuzər Xələfov, Tofiq Hüseynoğlu, Ramiz Əsgər, Əməkdar jurnalist İlyas Adıgözəlov, eləcə də Türk xalqları ədəbiyyatı kafedrasının professor-müəllim heyəti çıxış ediblər.

Sonda çıxış edən professor P.Xəlilov 90 illik yubileyinin keçirilməsinə görə universitet rəhbərliyinə, o cümlədən tədbir təşkilatçıları və iştirakçılarına təşəkkür edib.

Bizi Twitter-dən izləyin: @trend_az


Tags:  BDU-da professor Pənah Xəlilovun 90 illik yubileyinə həsr olunmuş konfrans keçirilib FOTO


RƏYLƏR


Top news