Aktual mövzular: Dollar alış-satışı , Hava haqqında, Məzənnə, Neftin qiyməti

ANS-dən Qənirə Ataşovanın sual qalmaqalına sərt reaksiya - VİDEO

ANS-dən Qənirə Ataşovanın sual qalmaqalına sərt reaksiya - VİDEO

Date: 20 December 2015 17:05

ANS TV Xəbərlər Xidmətinin baş redaktoru Xanım Yadigarlı ANS-in ABŞ-dakı xüsusi müxbiri Qənirə Ataşovanın sualı ətrafındakı qalmaqala rəy bildirib.

Musavat.com-un xəbərinə görə, həmin açıqlama aşağıdakı kimidir: "Dünən həmkarım və əməkdaşımız Qənirə Ataşovanın ABŞ Dövlət Departamentinin mətbuat katibinə ünvanladığı sualına mənşəyi və məqsədi bəlli olmayan bir sira cırtdan saytlarda dərc olunan şərhlər və birmənalı olmayan reaksiyalar məni məyus etməyə bilməzdi...

Azərbaycan müstəqil dövlətdir və köləlik dövründən 20 ildən çoxdur ki çıxıb və vuruşaraq istiqlaliyyət qazanıb. Ərəb, rus, ingilis, fars, fransız, alman və digər dillərə hörmət etsə də dövlət dili olaraq yalnız Azərbaycan dilini seçib. ANS TV rəhbərliyi Xarici bürolarına rəhbər seçərkən, əsasən, savada, təfəkkürə, reportyor və analitik qabiliyyətinə önəm verir, müxbirlərimizin əcnəbi dili səlis bilməsi məsələsini əsas qoymur, elə buna görə də bürolarda tərcüməçilər çalışır... Jurnalist Qənirə Ataşovaya gəldikdə isə, O, 20 ildən artıqdır ki, bu sahədə çalışır, Azərbaycanın ən ağır günlərində peşəkarlıqla xalqa xidmət edib, beynəlxalq jurnalistika assosiasiyaları tərəfindən dəfələrlə qiymətləndirilib, Azərbaycan rəhbərliyi tərəfindən mükafatlandırılıb.

Mən çəkinmədən onu dünya miqyaslı jurnalist adlandırıram. Qənirə xanım ANS-in ABŞ bürosunda artıq 8 aydan çoxdur ki, fəaliyyət göstərir və 120-dən çox reportaj hazırlayıb. Onların arasında ABŞ-ın bir sıra yüksək vəzifəli şəxsləri ilə müsahibələr də olub - o cümlədən elə adıçəkilən Ceyms Uorliklə... ABŞ dövlət departamentinin adıçəkilən mötəbər mətbuat konfransına müəmmalı səbəbdən ANS-in tərcüməçisi daxil ola bilməyib və Qənirə Ataşova Azərbaycan üçün çox vacib olan sualı bacardığı kimi verib: "Necə ola bilər ki, həmsədr Ceyms Uorlik Konqresdə separatçı Dağlıq Qarabağ rəhbərliyi ilə görüş keçirir? Buna necə qiymət verə bilərsiz?" Mən Qənirə Ataşovanı yaxşı tanıyıram... Ola bilməzdi ki, onun kimi vətənpərvər jurnalist bu sualı Con Kirbiyə verməsin, onun ingilis dili imkanları heç olmasaydı belə, o ən azı əl işarələri ilə bu sualı başa salacaqdı və sualına cavab alacaqdı. Ona görə ki, bu Azərbaycan üçün taleyüklü sualdı! Eyni zamanda Con Kirbi, öz növbəsində, bu suala cavab verməli idi. Sual yaranır: Axı nə cavab verəydi?

Təəssüf hissi ilə xatırlatmaq istəyirəm ki, Azərbaycanı həmin mötəbər tədbirdə yalnız ANS təmsil edir və olaydan 15 min km uzaq məsafədən oturub, məsələdən bixəbər olanlara bir də anlatmaq istəyirəm - Peşəkar və vətənpərvər jurnalist məhz belə etməli idi! Ona görə də Qənirə Ataşovaya minnətdar olmaq lazımdır, qınamaq yox. Qınanılası tərəf varsa, o, bu gün də kölə psixologiyası ilə yaşayan və heç bundan xilas olmağa cəhd də etməyənlərdir..."

Qeyd edək ki, bu mövzuda fərqli fikirdə olanlar da var. Onların arasında nüfuzlu jurnalistlər, ictimai-siyasi xadimlər də vardır. Onların fikri belədir ki, bu cür mötəbər tədbirlərdə Azərbaycan adından ingilis dilini bilən jurnalist sual verməlidir. Bu mövqenin müdafiəçiləri iddia edirlər ki, ümumiyyətlə, hər hansı bir KİV-in Amerika bürosuna ingilis dilini bilməyən jurnalistin rəhbər təyin edilməsi nonsesdir: "Bu halda, Qənirə Ataşova Azərbaycana fayda verməyib, onu biabır edib, bizdə jurnalizmin səviyyəsi barədə yanlış təəssürat yaradıb, bizi gülünc vəziyyətə qoyub", deyə bu mövqedə olan tanınmış media ekspertlərindən biri müsavat.com müxbirinə deyib. 

Milli.Az


Tags:  ANS-dən Qənirə Ataşovanın sual qalmaqalına sərt reaksiya VİDEO


RƏYLƏR


Top news