Aktual mövzular: Dollar alış-satışı , Çempionlar Liqası, Hava haqqında, Məzənnə, Neftin qiyməti

Eldar Sabiroğlunun oğlu işindən istefa verdi-Bakıdan Zərdaba saytla məktublaşdılar

Eldar Sabiroğlunun oğlu işindən istefa verdi-Bakıdan Zərdaba saytla məktublaşdılar

Date: 21 December 2015 01:04

Yeni Azərbaycan Partiyasının üzvü, “91-lər”dən olan, keçmiş deputat və Müdafiə Nazirliyinin mətbuat xidmətinin sabiq rəhbəri Eldar Sabiroğlunun oğlu Rüfət Səfərov prokurorluq orqanlarından istefa verib.

 

“Azadlıq” qəzetinin yazdığına görə, R. Səfərov  ikinci dərəcəli hüquqşünas kimi 5 il Zərdab rayon prokurorluğunda müstəntiq vəzifəsini tutub. Dediyinə görə, bu illər ərzində heç kimlə şəxsi zəmində problemləri olmayıb. Bu gün istefa verməsi də özünün istəyi ilə bağlı olub: “Ali təhsilimi başa vurduqdan sonra təxminən 6 il Kənd Təsərrüfatı Nazirliyində aqrar hüquq sahəsində hüquqşünas kimi çalışmışam. 2011-ci ildə üç mərhələli imtahandan sonra prokurorluq orqanlarına daxil olmuşam. 5 ilə yaxındır müstəntiq kimi fəaliyyət göstərirəm”.

 

R. Səfərov istefasını “insanların haqq və hüquqlarının tapdanması”na dözə bilmədiyi üçün etdiyini vurğulayıb.

 

R. Səfərov atası Eldar Sabiroğlunun ondan üz döndərəcəyini, hətta rəsmi səviyyədə imtina edəcəyini də istisna etməyib: “Atam Eldar Sabiroğlu Yeni Azərbaycan Partiyasının yaradıcılarındandır. Bu gün də həmin partiyanın sıralarındadır. Atam zəng edib məni tənbeh etdi. Bəlkə də məhkəmə qaydası ilə məndən imtina da edəcək”.

 

O, atasında da qəzet vasitəsilə müraciət edib və narahat olmamağı məsləhət görüb.

 

O, baş prokuror Zakir Qaralova da müraciət edib və istefa ərizəsini faksla ünvanlayacağını bildirib.

 

R. Səfərov hüquq sistemi ilə bağlı faktlar açıqlayacağını da yazıb.

 

R. Səfərov moderator.az saytına açıqlamasında hazırda Zərdab rayonunda olduğunu bildirib. O, hələ ki heç bir müxalifət partiyasına üzv olmadığını da bildirib.  

 

Onun atası E. Sabiroğlu da oğluna elə bu sayt vasitəsilə məktub yazıb.  

 

“Həyatın keşməkeşlərini az görməmişdim, ancaq səndən belə bir zərbə alacağımı heç ağlıma gətirməzdim. Bağışlamaq çətindir, ancaq sən mənim övladımsan, səndən necə keçə bilərəm ki. Ata-bala kimi aramızda çox söhbətlərimiz olub. Sənə böyük ümidlərim var idi, qırdın...” yazan E. Sabiroğlu oğlundan imtina etməyəcəyini də bildirib.

 

 

YAP Siyasi Şurasının üzvü, deputat Aydın Mirzəzadə isə modern.az saytına açıqlamasında prokurorluq orqanlarında çalışan şəxsin bu cür çıxış etməsinə təəssüfləndiyini bildirib.

 

 

“Təəssüf edirəm ki, vaxtilə Yeni Azərbaycan Partiyasında mühüm vəzifə tutmuş şəxsin övladı belə fikirlər söyləyir. Hansısa işdən uzaqlaşmağı siyasiləşdirmək düzgün deyil. Bu gün hüquq-mühafizə orqanlarımızda şəffaflıq var, qanuna hörmət mühiti var. Bu baxımdan kimlərinsə işdən getməsini mütləq siyasətə bağlamağın və yaxud da nə iləsə ittiham etməyin özü də düzgün deyil. Hüquqşünas yaxşı bilməlidir ki, dediyi hər bir sözü təsdiqedici faktlarla ortaya qoymalıdır.

 

Ümumi şəkildə ittiham etməyin özü həmin ittihamın düzgün olmadığını göstərir. Çox istərdim ki, gənclərimiz hər bir məsələyə hüquqi, dövlətçilik baxımdan, özlərinin dövlətçiliyə verdiyi töhfə konteksindən baxaydılar”. 

 

Aydın Mirzəzadə keçmiş YAP-çı deputatın oğlunun müxalifətə keçməsi məsələsinə təəccüb etdiyi deyib. 

 

“Onun müxalifətə keçməsi həqiqətdirmi?! İnana bilmirəm ki, Eldar Sabiroğlunun oğlu müxalifətə keçib. Çünki YAP-ın fəaliyyətində fəal iştirak etmiş bir şəxsin övladının müxalifətə keçməsi halları Azərbaycanda indiyə kimi olmayıb. Buna inana bilmirəm. Hər halda, sonrakı addımlarına görə fikir bildirmək olar”.

 


Tags:  Eldar Sabiroğlunun oğlu işindən istefa verdi-Bakıdan Zərdaba saytla məktublaşdılar


RƏYLƏR


Top news