Bakı, 23 dekabr, AZƏRTAC
Bakıdakı 177 nömrəli tam orta məktəbdə Xalq Şairi, görkəmli dramaturq, ictimai xadim Bəxtiyar Vahabzadənin 90 illik yubileyinə həsr olunmuş ədəbi-bədii tədbir keçirilib.
Məktəbdən AZƏRTAC-a bildiriblər ki, tədbirdə dil-ədəbiyyat müəllimi Nazilə Əliyeva böyük ədib Bəxtiyar Vahabzadənin mənalı ömür yolu, zəngin yaradıcılığı, elmi, pedaqoji, ictimai fəaliyyəti barədə danışıb.
Görkəmli şair və dramaturq B.Vahabzadənin ölməz əsərlər müəllifi olduğunu vurğulayan N. Əliyeva, ədibin əziz xatirəsinin ürəklərdə zaman-zaman yaşayacağını bildirib.
Sonra böyük sənətkarın yaradıcılığı ilə bağlı videoçarx nümayiş etdirilib.
Şagirdlər Bəxtiyar Vahabzadənin şeirlərini və sözlərinə yazılmış mahnıları ifa ediblər.
