Aktual mövzular: Dollar alış-satışı , Hava haqqında, Məzənnə, Neftin qiyməti

“Müharibə üzlərdə” foto-jurnalının təqdimatı olub

“Müharibə üzlərdə” foto-jurnalının təqdimatı olub

Date: 25 December 2015 19:23


Bakı, 25 dekabr, AZƏRTAC
Dekabrın 25-də Litva əsilli Azərbaycan vətəndaşı, Əməkdar Jurnalist Tatyana Çaladzenin “Müharibə üzlərdə” foto-jurnalının təqdimatı olub.
AZƏRTAC xəbər verir ki, təqdimat mərasimində “Azərbaycan Respublikasının Dağlıq Qarabağ Bölgəsinin Azərbaycanlı İcması” İctimai Birliyinin sədri Bayram Səfərov, Prezident Administrasiyasının ictimai-siyasi məsələlər şöbəsinin məsul əməkdaşı Vüqar Səlimov, Milli Məclisin deputatları Elman Məmmədov, Flora Qasımova, işğal olunmuş rayonların sakinlərinin bir qismi iştirak ediblər.
Tədbirdə İctimai Birliyin sədri Bayram Səfərov Ermənistan-Azərbaycan, Qarabağ münaqişənin yaranma tarixi, Ermənistanın işğalçılıq siyasəti barədə məlumat verib. O, foto-jurnalda Qarabağ müharibəsinin həqiqətlərinin əks olunduğunu diqqətə çatdırıb. Belə tutarlı faktlara əsaslanan kitabların, filmlərin, məqalələrin sayının çox olmasının önəmini vurğulayıb.
Nəşrin müəllifi Tatyana Çaladze çıxış edərək deyib ki, bu, onun ikinci foto jurnalıdır. O, Qarabağ müharibəsindən bəhs edən ilk jurnalının 1992-ci ildə dərc olunduğunu deyib. Müharibə dövründə çəkiliş apardığı çətin anlardan bəhs edən müəllif vurğulayıb ki, çəkdiyi fotolar bu həqiqətlərdən yalnız bir qismini əks etdirir.
Tədbirdə çıxış edən Vüqar Səlimov T.Çaladzenin fərqli yaradıcılıq xüsusiyyətlərinə diqqəti cəlb edib. Bildirib ki, o, qaynar cəbhə bölgəsindən, odun-alovun içərisindən maraqlı məqamları, döyüşçülərimizin şəkillərini fotokamerasının yaddaşına köçürür. Xarici mətbuatda Qarabağ müharibəsi ilə bağlı dərc olunan qərəzli yazılara tutarlı cavablar verir.
Digər çıxış edənlər də foto-jurnalın önəmindən danışıblar.
Azərbaycan, rus, ingilis dillərində nəşr edilən jurnalla www.facesofkarabakhwar.com saytında tanış olmaq mümkündür.
Foto-jurnal Azərbaycan Respublikasının Prezidenti yanında Qeyri-Hökumət təşkilatlarına Dövlət Dəstəyi Şurasının, Azərbaycan Qaçqın və Məcburi Köçkünlərin Hüquqlarının Müdafiəsi Mərkəzi tərəfindən nəşr olunub.






Tags:  Müharibə üzlərdə foto-jurnalının təqdimatı olub


RƏYLƏR


Top news