"Şura, sadəcə, donor deyil, QHT-lərin inkişafı üçün məqsədyönlü siyasət həyata keçirən dövlət qurumudur" - FOTO

"Şura, sadəcə, donor deyil, QHT-lərin inkişafı üçün məqsədyönlü siyasət həyata keçirən dövlət qurumudur" - FOTO
20:42 25 Dekabr 2015
15 Digər
Ölkə mətbuatı
A- A+

Bu gün Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası Katibliyinin müşavirəsi keçirilib.

Şuranın Mətbuat xidmətindən Trend-ə verilən məlumata görə, iclasda çıxış edən Şura sədri, millət vəkili Azay Quliyev rəhbərlik etdiyi qurumun 2015-ci ildəki fəaliyyətinin məhsuldar olduğunu bildirib.

Şura sədri yerli və beynəlxalq layihələrin icra vəziyyəti, ictimaiyyətlə əlaqələrin qurulması, layihə və hesabatların elektron formada qəbulu və digər sahələrdə uğurlu nəticələrin əldə edildiyini deyib: "Şura, sadəcə, donor deyil, QHT-lərin hərtərəfli inkişafı üçün məqsədyönlü siyasət həyata keçirən dövlət qurumudur".

QHT-lərin müqavilə öhdəliklərinə əməl olunması ilə bağlı məsuliyyətlərinin artırılmasının vacibliyini bildirən A.Quliyev dövlət vəsaitindən maksimum dərəcədə səmərəli və qənaətlə istifadə edilməsinin Şuranın fəaliyyətinin dəyişilməz istiqaməti olduğunu vurğulayıb.

Katibliyin fəaliyyəti haqqında geniş hesabatla çıxış edən icraçı direktor Fərasət Qurbanov Şuranın 2015-ci ildə 520 yerli və xarici QHT-nin layihəsini dəstəklədiyini, keçirilən təlim, seminar və konfranslarda ümumilikdə 72 min şəxsin iştirak etdiyini qeyd edib.

O, 2015-ci ildə QHT-lərin bilik və bacarıqlarının, təcrübələrinin artırılması üçün "Layihə hazırlığı", "Monitorinq və qiymətləndirmə", "İctimai problemlərin müəyyən olunması mexanizmləri" və digər mövzularda paytaxtda və regionlarda fəaliyyət göstərən QHT-lər üçün çoxsaylı təlimlərin keçirildiyini deyib.

Hazırda Bakı və Qazaxda bu cür təlimlərin davam etdirildiyini deyən F.Qurbanov, həmçinin cari ildə 300-dən artıq QHT-yə illik maliyyə hesabatlarının hazırlanması ilə bağlı praktik yardımların göstərildiyini bildirib.

Müşavirədə Şuranın baş mühasibi Emin Məmmədov, hüquqşünas Rauf Məcidbəyli, mətbuat xidmətinin rəhbəri Elməddin Behbud, baş məsləhətçi Xanım Cəbrayılova və digər şəxslər 2015-ci ildə müvafiq sahələr üzrə görülmüş işlərlə bağlı hesabatla çıxış ediblər.

İclasın yekununa Şura sədri Azay Quliyev QHT layihələrinin icrasının səmərəliliyinin artırılması, audiovizual və çap məhsullarına nəzarətin gücləndirilməsi, sərgilərin keçirilməsi və digər məsələlər ilə bağlı Katiblik əməkdaşlarına tapşırıq və tövsiyələrini verib.

Milli.Az


Xəbərin orijinal ünvanı: http://news.milli.az/country/393166.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR