Aktual mövzular: Dollar alış-satışı , Barselona - Real, Hava haqqında, Məzənnə, Neftin qiyməti

Azərbaycan prezidentinin 2015-ci il ərzində fəaliyyəti hansı məqamlarla yadda qaldı?

Date: 27 December 2015 18:27

2015-ci il ölkə prezidenti İlham Əliyevin regionlara səfəri, bir sıra sosialyönümlü obyektlərin açılışında iştirakı ilə yadda qaldı. Kəpəz TV (Region TV) xəbər verir ki, dövlət başçısı səfər çərçivəsində bölgələrdə aparılan abadlıq və quruculuq işləri ilə yaxından tanış oldu. 
 
Prezident İlham Əliyevin regionlara səfəri zamanı açılışı edilən sosialyönümlü və turizm obyektləri, abadlıq və quruculuq işləri aparılan istirahət mərkəzləri bir daha göstərdi ki, son illərdə ölkədə həyata keçirilən sosial-iqtisadi inkişaf strategiyası bölgələrin daha da gözəlləşməsi, regionların simasına yeni elementlərin əlavə olunması ilə müşayiət edilir. Şəhər və rayonlarımızda aparılan quruculuq işləri çərçivəsində park və xiyabanların salınması, mövcud olanların isə yenidən qurulması diqqətdən kənarda qalmır. Sumqayıtda Nəsimi adına şəhər mədəniyyət və istirahət parkının yenidən qurulması da bu baxımdan xüsusi əhəmiyyət kəsb edir. Ölkədə neft sektoru ilə bərabər, qeyri-neft sahələrinin də davamlı inkişafına nail olunur. Bu məqsədlə tikilən "Alyans Tekstil" tikiş fabriki ildə 100 min dəst müxtəlif işçi geyimləri - gödəkçələr, kombinezonlar, kostyum və dəstlər istehsal etmək gücünə malikdir.  Beton məmulatı zavodu avadanlığın sayına və həcminə görə, Şərqi Avropada analoqu olmayan ən böyük müəssisədir. Dövlət başçısı Sumqayıta növbəti səfərində Texniki Avadanlıqlar Zavodunun açılışı, yüksək sıxlıqlı polietilen zavodunun təməlqoyma mərasimi oldu.  Elə həmin gün "Azərkimya" İstehsalat Birliyinin etilen-polietilen zavodunda yeni qurğular da işə salındı. 

2015-ci il ərzində dövlət başçısının ən çox səfər etdiyi bölgə Aran-Qarabağ bölgəsidir. Mingəçevir şəhər mərkəzi xəstəxanasında ilk dəfə olaraq, 10 çarpayılıq dializ otağı yaradılıb. Bu da dializə ehtiyacı olan xəstələrin hamısını əhatə edəcək və onların paytaxta getməsinə ehtiyac olmayacaq. Tikintisi nəzərdə tutulan "Mingəçevir Sənaye Parkı"nda mahlıc, iplik, toxuculuq, boyama, tikiş və digər istehsal sahələri yaradılacaq, 2 mindən çox sakin işlə təmin olunacaq. "Ağsaray" otel kompleksi də yeni iş yerlərinin açılması baxımından əhəmiyyətlidir. 

Dövlət başçısının Kürdəmirə səfəri çərçivəsində 100 yerlik körpələr evi-uşaq bağçası, Yeni Azərbaycan Partiyası Kürdəmir rayon təşkilatının, Atakişili kənd tam orta məktəbinin binası istifadəyə verilib. Mollakənd-Axtaçı-Öyləqulu və Ağsu-Kürdəmir-İmişli avtomobil yolunun Ağsu-Kürdəmir hissəsinin açılışı olub.  

Ağsuya səfər isə Əmək və Əhalinin Sosial Müdafiəsi Nazirliyinin Respublika Əlillərin Bərpa Mərkəzinin, Ağsu Şahmat Məktəbinin yenidənqurma işlərindən sonra açılışı ilə yadda qaldı. İçməli suya tələbatı təmin etmək üçün suyun Külüllü ərazisində Girdimançayın məcrası altından və Ağsuçayın yuxarı hissəsində mövcud olan quzey bulaqlarından götürülməsi nəzərdə tutulub. 
Ucarda bu il quşçuluq sahəsinin inkişafı üçün münbit zəmin yaranıb. Qazıqumlaq kəndi ərazisində hər biri 35 min quş tutumuna malik 25 ferma inşa edilib. Alpout kəndində saatda 6 min quş kəsimi gücünə malik müasir quş əti emalı fabriki tikilib. Göyçay-Ucar avtomobil yolu üzərində müxtəlif qovşaqlar, həmçinin bir dəmiryol körpüsü yerləşir.  "Göyçay" Su Elektrik Stansiyasının açılışında isə bildirilib ki, stansiya ildə 20 milyon kilovat-saat elektrik enerjisi istehsal etməyə imkan verəcək. 

Bərdədə ulu öndər Heydər Əliyevin adını daşıyan park-bulvar kompleksi Gəncə şəhərindəkindən sonra ən böyük mədəniyyət və istirahət mərkəzidir. Rayonda Asan Xidmətin fəaliyyətə başlaması isə bürokratik əngəllərin aradan qalxmasına gətirib çıxarıb və korrupsiyaya təsirli zərbə olub. 

Mollaisalar-Vəliuşağı-Mollaəhmədli-Sərkarlar avtomobil yolunun istifadəyə verilməsi ilə Alpoud və Nazırlı kəndləri arasında gediş-gəliş məsafəsi 3 dəfə azalıb. Qarabağ Aqrar Sənaye Parkına 5 min tonluq logistik mərkəz, 4200 başlıq ətlik və südlük istiqamətli heyvandarlıq kompleksləri, illik 5,4 min ton istehsal gücünə malik ət kəsimi və emalı fabriki, saatda 10 ton yem istehsal edən zavod daxildir. 

Dövlət başçısı cənub bölgəsinə səfəri zamanı "Astaraçay" MMC-nin Çay Emalı fabrikində yaradılan şəraitlə tanış olub. Astaranın dənizkənarı park-bulvar kompleksi regionun simasını dəyişərək daha da gözəlləşdirir. Deqədi-Pəlikəş avtomobil yolunun tikintisi də  2015-ci ildə yekunlaşdı. 
Aqrar sektorda mövcud olan problemlərin həllini və kompleks yanaşmanı təmin etmək üçün Lənkəranda yeni "Gilan Aqro-Sitrus" təsərrüfatı yaradıldı. Liman-Nərimanabad-Balıqçılar avtomobil yolunun inşası sosialyönümlü tədbir olmaqla yanaşı, ölkəmizin iqtisadi qüdrətinin nümayişi baxımından da mühüm əhəmiyyət daşıyır. 

Ulu öndər Heydər Əliyevin xalqımız qarşısındakı tarixi xidmətlərini daha dərindən öyrənmək məqsədilə Cəlilabadda Heydər Əliyev Mərkəzi yaradılıb. Cənublu balacalar da diqqətdən kənarda qalmayıb. 100 yerlik körpələr evi-uşaq bağçası tikilib. Rayon ərazisindən keçən Alar-Təzəkənd-Üçtəpə-Əliqasımlı-Cəfərxanlı avtomobil yolu qəsəbə və kəndlərdəki ara yolların müasir səviyyəyə çatdırılmasını bir daha sübut edir.  

Yol-nəqliyyat strukturunda aparılan dəyişikliklər ölkənin şimal bölgəsindən də yan keçməyib. Siyəzən-Məşrif avtomobil yolundan 4700-dək sakin istifadə edəcək. Şabran rayonunda "Qalaaltı Hotel & Spa" müasir müalicə-istirahət kompleksinin inşası regionun turizm imkanlarının artırılması baxımından mühüm əhəmiyyət daşıyır. 2015-ci ildə yadda qalan hadisələrdən biri də "Samur-Abşeron suvarma sisteminin yenidən qurulması" layihəsi çərçivəsində Xızı və Siyəzən rayonunda yeni suvarılacaq torpaqlarda meliorativ tədbirlərin başa çatdırılaraq Taxtakörpü-Ceyranbatan kanalından suvarma suyunun verilməsi oldu. 

İlham Əliyev - Azərbaycan Respublikasının prezidenti: "Bir də bu layihənin üstünlüyü ondan ibarətdir ki, bu ərazi bizim ixrac bazarlarına da çox yaxındır. Bizim əsas ixrac bazarımız Rusiyadır. Bu il ərzində Rusiyaya bizim ixrac etdiyimiz məhsullar artıb. Burada yetişdirilən məhsulları həm daxili, həm də xarici bazarlara çıxarmaq üçün çox gözəl imkanlar olacaq. Dəmir yolu, avtomobil yolu ilə Rusiya sərhədinə yüz kilometrdən bir qədər çoxdur. Eyni yanaşma qərb zonasında da olmalıdır. Şəmkirçay su anbarı istifadəyə veriləndən sonra artıq orada aqropark tikilir. Orada da bir neçə böyük təsərrüfat yaradılmalıdır. Yəni, eyni layihələri o bölgə üçün də hazırlayın. Düzdür, orada bir layihə artıq başlayır - Şəmkir aqroparkı. Ancaq orada bir çox layihələr icra edilməlidir".  

Ölkə prezidenti İlham Əliyev Şimal-qərb bölgəsinə səfərində Zaqatala-Danaçı-Aşağı Çardaxlar avtomobil yolunun,  Şəki-Qax-Zaqatala avtomobil yolunun Şəki-Qax hissəsi yenidənqurmadan sonra açılışı oldu. Dövlət başçısı Yevlax-Balakən magistral yolu üzərində yerləşən, Yuxarı və Aşağı Tala kəndlərinin, həmçinin Zaqatala şəhərinin ərazisindən keçən hissəsinin genişləndirilməsi və abadlaşdırılması işləri ilə tanış oldu. Səfər zamanı açılışı olan obyektlər sırasında Müəllimlər İnstitutunun Zaqatala filialının, Qoxmuq kənd tam orta məktəbinin və Şəki Məhkəmə Kompleksinin yeni inzibati binası da var idi. Prezident "Marxal" müalicə-istirahət kompleksində tikinti işlərinin gedişi ilə tanış olub. Kompleksdə 412 yerdən ibarət 178 otaqlı yeddimərtəbəli mehmanxana binası inşa olunur.

Dövlət başçısının Naxçıvan Muxtar Respublikasına səfəri Beynəlxalq Hava Limanının "Şərq Terminalı" ilə tanışlıqla başladı. Yeniliklər imkan verir ki, hava limanının sərnişin dövriyyəsi 2 dəfədən çox artaraq saatda 150-200 nəfərdən 400-450 nəfərə çatsın. Yenidənqurma işləri təhsil müəssisələri və səhiyyə ocaqlarında da həyata keçirilib. Elə Babək rayonunun Nehrəm kənd 2 saylı tam orta məktəbi,  2 saylı uşaq musiqi məktəbi və Naxçıvan Muxtar Respublika Xəstəxanası da bu sırada yer alıb. Bakı ilə yanaşı, respublikanın bütün regionlarında mühüm yol-nəqliyyat layihələri icra olunur. Bu tədbirlərin nəticəsidir ki, Şəkərabad-Babək qəsəbə-Nehrəm-Arazkənd dairəvi avtomobil yolu yenidən qurulub. Muxtar Respublikada Sənaye Kompleksinin açılması daxili tələbatın yerli istehsal hesabına ödənilməsinə və ixrac potensialının artmasına şərait yaradır. Dövlət başçısı səfəri çərçivəsində şəhərdaxili su şəbəkəsi istifadəyə verildi, Naxçıvan Günəş Elektrik Stansiyası açıldı. Bu layihə alternativ enerji mənbəyi kimi gələcəkdə Naxçıvanın enerji təminatının ödənilməsində mühüm rol oynayacaq. 

Milli.Az


Tags:  Azərbaycan prezidentinin 2015-ci il ərzində fəaliyyəti hansı məqamlarla yadda qaldı

RƏYLƏR


Top news