Aktual mövzular: Dollar alış-satışı , Hava haqqında, Məzənnə, Neftin qiyməti

Dolların pasportla alınması təklif edilir

Dolların pasportla alınması təklif edilir

Date: 28 December 2015 21:17

Milli.Az xəbər verir ki, dünəndən etibarən Rusiya Mərkəzi Bankının valyuta mübadiləsi əməliyyatları ilə bağlı yeni qaydaları qüvvəyə minib. Yeni qaydalara görə, bundan sonra 15 min rubldan çox vəsait dəyişdirildikdə bankların müştəriləri öz ad və soyadını bildirməklə yanaşı, qeydiyyat ünvanı, təvəllüdü, əgər varsa VÖEN nömrəsi barədə məlumatları da verməlidirlər.

Anket bank əməkdaşı tərəfindən doldurulacaq. Müştəri haqqında məlumatlar mübadilə əməliyyatından sonrakı 5 il müddətində saxlanılacaq. Valyuta mübadiləsini xarici pasportla da etmək mümkün olacaq. Lakin bu zaman da qeydiyyat ünvanı mütləq göstərilməlidir. 15 min rubladək pulu isə əvvəlki qaydada pasport təqdim etmədən dəyişmək olacaq.

Rusiya Mərkəzi Bankı bəyan edib ki, yeni qaydalar məhdudlaşdırıcı xarakterli deyil. Sadəcə bu addımlar "çirkli pullar"ın yuyulması və terrorizmin maliyyələşdirilməsinə qarşı mübarizə məqsədilə atılır.

Bəs bu qaydaları Azərbaycanda tətbiq etmək olarmı? Bununla bağlı Milli.Az-a açıqlama verən İqtisadi və Sosial İnkişaf Mərkəzinin (İSİM) rəhbəri, iqtisadçı-ekspert Vüqar Bayramov bildirib ki, onlar da Azərbaycanda xarici valyutanın şəxsiyyət vəsiqəsi və ya pasportla satılmasının tərəfdarıdırlar: "Çünki belə üsul spekulyasiya imkanlarını xeyli məhdudlaşdırır. Eyni zamanda, bu yolla çirkli pulların yuyulmasının qarşısı alınır, xeyli ehtiyatlılıq yaranır. Nəzərə alsaq ki, fevral devalvasiyasının baş vermə səbəblərindən biri də bazarda spekulyativ olaraq 1 gün ərzində yarım milyard dolların satılması ilə bağlıdır. Təbii ki, spekulyasiya olmasaydı da, devalvasiya baş verəcəkdi. Amma bəzən müxtəlif əyri yollarla qazanılmış vəsaitin yuyulması halları baş verir. Bunun da qarşısını almaq üçün bunun qeydiyyatını aparmağa ehtiyac var. Rusiya hökuməti də bu addıma səbəb kimi çirkli pulların yuyulması və terrorizmlə mübarizəni göstərsə də, əsl məqsəd xarici valyutanın, xüsusən də dolların satışının tənzimlənməsi, dollara olan tələbatın ödənilməsində inzibati metodlardan istifadə edilməsidir. Çünki Rusiyada dollara olan tələbin ödənilməsində kəskin problemlər var, ona görə də bu yolla problemi qismən həll etməyə çalışırlar".

İSİM rəhbəri qeyd edib ki, özü qadağaların əleyhinə olsa da, valyuta alqı-satqısının qeydə alınmasının tərəfdarıdır: "Çünki qadağaların müəyyənləşdirilməsi "qara bazar" yaradır və insanlar dolları "qara bazar"da axtarmaq məcburiyyətində qalır. Amma bu rəsmiləşərsə, həm çirkli pulların yuyulmasına, həm də prosesə nəzarət imkanları genişlənəcək, "qara bazar" da yaranmayacaq. Ona görə də bizdə də Rusiya təcrübəsinin tam olaraq tətbiqini deyil, oradakı kimi xarici valyuta alqı-satqısının rəsmiləşdirilməsini və qeydiyyata alınmasını təklif edirik.

Amma mən dəyişdirilən pullarla bağlı limitin qoyulmasının tərəfdarı deyiləm. Əksər xarici ölkələrdə olduğu kimi, kimsə dollar alırsa, şəxsiyyət vəsiqəsi və ya pasportdakı məlumatlar xüsusi blanka qeyd edildikdən sonra dolların alqı-satqısı həyata keçirilir. Bu təcrübə əksər inkişaf etmiş ölkələrdə tətbiq olunur və heç bir limit də qoyulmur. 
Bunun tətbiqi heç də o anlama gəlmir ki, bu addım manatın məzənnəsinin stabilləşməsinə gətirib çıxaracaq, amma bütün hallarda prosesin leqallaşdırılmasına və ona nəzarətin gücləndirilməsinə səbəb olacaq, eyni zamanda spekulyativ manevr imkanlarını xeyli azaldacaq. Bu, eyni zamanda pulların necə, haradan, kimlərdən gəldiyini müəyyənləşdirməyə imkan verəcək. Xüsusən, çirkli yolarla əldə edilmiş pulların dollarlaşmasının müəyyən qədər qarşısını alacaq".

İlkin İzzət

Milli.Az


Tags:  Dolların pasportla alınması təklif edilir


RƏYLƏR


Top news