Qarşıdan gələn 2016-cı il, Çin təqviminə görə, Qırmızı Meymun üstündə təhvil olacaq. İxtiraçı və orijinal olan meymun ən çətin məsələləri belə həll etmək bacarığına malikdir. Meymunlar çox mehriban olduğundan ilk baxışdan adama elə gəlir ki, onlar hamı ilə yola gedirlər. Əslində isə, onlar başqaları ilə bağlı yaxşı fikirdə olmur və özlərini hər kəsdən üstün sayırlar. Meymunun hədəfləri həmişə gizlidir. Onun oyun qaydaları sadə görünsə də, əslində təhlükəli və amansızdır. Meymun xəyanətə meyllidir, münaqişə yaratmaq, yalanlarla idarə etmək, gözləmədiyin yerdən vurmaq onun peşəsidir.
Odur ki, gözləmədiyiniz istiqamətdən zərbə almaq istəmirsinizsə, sabah qüsursuz görünməyə çalışın.
Bunun üçün publika.az-ın "9 don" layihəsi çərçivəsində qonağımız olan əməkdar incəsənət xadimi və Azərbaycanın peşəkar modelyeri Fəxriyyə Xələfovanın məsləhətlərinə mütləq əməl edin.
- Yeni il gecəsi xanımlara necə geyinməyi məsləhət görürsünüz?
- Gələn ilin Qırmızı Meymun üzərində təhvil olduğunu nəzərə alsaq, həmin axşam üçün ən ideal rəng qırmızıdır. Əgər qırmızı rəng kiminsə zövqünə uyğun deyilsə, o halda bayram gecəsində əlvan rənglərə müraciət etmək tövsiyə olunur. Beynəlxalq Rəng Təşkilatı "Pantone" 2016-cı ildə dəbdə olacaq rənglərin siyahısını hazırlayıb. Təşkilatın proqnozuna görə, gələn il açıq çəhrayı və zümrüdün açıq tonları dəbdə olacaq. Yeni il libasını bu proqnoza əsasən də müəyyənləşdirmək olar. Qış mövsümünə baxmayaraq, çəhrayı və zümrüdün bir çox çaları da bayram üçün ideal seçim ola bilər. Çünki mütəxəssislər hesab edirlər ki, ağır keçən 2015-ci ildən fərqli olaraq, bahar rəngləri qarşıdan gələn ilə sakitlik və əmin-amanlıq bəxş edəcək. Xüsusi vurğulamaq lazımdır ki, romantik tərzdə biçilmiş çiçəkli donlar da Yeni il axşamı üçün ən uğurlu variantlardan biridir. Hər hansı çiçəkli paltar, çiçəkli ətək və ya köynək də gözəl bayram əhval-ruhiyyəsi yaradacaq. Geyimin modelinə gəlincə, buna Yeni ili harada və necə qarşılayacağınıza görə qərar vermək daha məqsəduyğundur. Məsələn, hər hansı şənliyə gedəcəksinizsə, şıq ziyafət libası geyinmək daha yaxşıdır. Əgər bayramı evdə ailə üzvlərinizlə birlikdə qeyd etməyi planlaşdırırsınızsa, uzun libaslar məsləhət deyil. Çünki bu cür libaslar ev üçün komfortlu deyil. Bu baxımdan bayramı evdə keçirən xanımlar üçün daha sadə donlar əlverişlidir.
Yeni il nağılabənzər bayramdır. Odur ki, hər hansı personajın obrazını da yarada bilərsiniz. Tac və ya şal kimi aksessuarlardan da maraqlı şahzadə obrazları yaratmaq olar. Təbii ki, şahzadə xanım obrazı daha gənc yaşda olan xanımlar üçün münasibdir. Saç düzümünüzü adi bir güllə tamamlamaqla fərqli obraza bürünmək olar. Yaxud da hörüklü saça aksessuar əlavə edərək romantik tərzdə görünə bilərsiniz.
Maraqlıdır ki, xüsusi günlərdə fərqli görünmək istəyən xanımların əksəriyyəti gənc yaş kateqoriyasına aiddir. Bəlli bir yaş dövründən sonra xanımlar geyim-kecimə biganə olurlar. Lakin çox istərdim ki, nənələrimiz və analarımız bayram günü zahiri görkəmlərinə laqeyd qalmasınlar. Çünki yaşından asılı olmayaraq, gözəl görünmək hər qadının haqqıdır. Qadınlar unutmasınlar ki, Yeni il libası, yəni düzgün seçilmiş obraz həmin axşamın qüsursuz keçməsi üçün bir zəmanətdir. Onu da qeyd edim ki, Yeni il bayramında geyindiyiniz paltarın mütləq cibi olmalıdır. Belə bir inanc var ki, Yeni ildə geyindiyiniz paltarın cibinə bir az pul qoymaq lazımdır. Deyilənlərə görə bu, qarşıdan gələn ilin uğurlu, ruzi və bərəkətli olmasına təsir edir. Əgər paltarın cibi yoxdursa, aksesuarlar köməyə gələ bilər. Məsələn, şərfi kəmərə düyünləyib pulu düyünün içinə qoymaq olar. O gecə pozitivə köklənin. Bəzən ən adi inanclar müsbət nəticələrə gətirib çıxara bilər.
- Bəs özünüz bu inanca əməl edirsiniz?
- Bəli, bu inanca hər il əməl edirəm. Bu, bir növ motivasiyadır. Yəni, simvolik xarakter daşıyır.
- Sirr deyilsə, bayram günü geyindiyiniz libasın cibinə nə qədər pul qoyacaqsız?
- Adətən, 50-100 manat qoyuram. Bu dəfə də elə olar, yəqin.
- Fəxriyyə xanım, kübar görünüşünüzlə həmişə seçilmisiniz. Maraqlıdır, bayram axşamı üçün özünüzə seçdiyiniz libas necədir?
- Bayram geyimini artıq müəyyən etmişəm. Nar rəngində orqanza parçadan tikilən libas geyinəcəm.
Milli.Az 
