Aktual mövzular: Dollar alış-satışı , Hava haqqında, Məzənnə, Neftin qiyməti

Yaponiyanın internet televiziyası Dünya Azərbaycanlılarının Həmrəylik Gününə həsr edilmiş veriliş yayımlayıb

Date: 29 December 2015 22:03


Tokio, 29 dekabr, AZƏRTAC
Yaponiyanın “World Investors TV” internet televiziyasının 2015-ci il üçün sonuncu buraxılışı Dünya Azərbaycanlılarının Həmrəylik Gününə həsr edilib.
Verilişin qonağı Hokkaydo Universiteti Əcnəbi Tələbələr Assosiasiyasının prezidenti, doktorant Əlibəy Məmmədov bu günün tarixçəsi haqqında tamaşaçılara ətraflı məlumat verib. Bildirib ki, 1991-ci il dekabrın 16-da, o zaman Naxçıvan Muxtar Respublikası Ali Məclisinin sədri, sonradan müstəqil Azərbaycan Respublikasının Prezidenti olmuş ümumilli lider Heydər Əliyev dünya azərbaycanlılarının birliyini yaratmağın əhəmiyyətini nəzərə alaraq dekabrın 31-ni Dünya Azərbaycanlılarının Həmrəylik Günü elan edib. Beləliklə, bütün azərbaycanlılar üçün əziz olan 31 dekabr Dünya Azərbaycanlılarının Həmrəylik Günü dövlət səviyyəsində bayram edilməyə başlanılıb. Təkcə Azərbaycanda deyil, dünyanın müxtəlif ölkələrində yaşayan həmvətənlərimiz bu günü böyük fəxr və qürur hissi ilə qeyd etməkdədirlər.
Tamaşaçıların diqqətinə çatdırılıb ki, azərbaycanlılar minilliklər boyu dünya sivilizasiyasına, mədəniyyətinə böyük töhfələr veriblər. Müharibələr, inqilablar, hərbi münaqişələr, dünyada gedən müxtəlif ictimai-siyasi proseslər nəticəsində Azərbaycan dəfələrlə parçalanıb, azərbaycanlıların bir çoxu öz dogma yurd-yuvalarından didərgin düşüb, deportasiyalara məruz qalıb. İş tapmaq, təhsil almaq məqsədilə doğma yurdu tərk edərək başqa ölkələrdə məskunlaşan azərbaycanlılar da var. Beləliklə, onlar tarixi Azərbaycan torpaqlarından bütün dünyaya yayılıblar və hazırda dünyanın bir çox ölkələrində, o cümlədən Yaponiyada yaşayırlar. İyirmi ildən çoxdur ki, 31 dekabr Dünya Azərbaycanlılarının Həmrəylik Günü kimi dünyanın müxtəlif ölkələrində yaşayan həmvətənlərimiz tərəfindən böyük ehtiramla qeyd olunur. Bu gün Azərbaycan diasporu üçün ən mühüm bayramlarından birinə çevrilib.
Verilişin aparıcısı Kazuyasu İşida Dünya Azərbaycanlıların Həmrəylik Günü ilə bağlı dost Azərbaycan xalqını təbrik edib, növbəti ildə də ölkəmizlə bağlı xüsusi verilişlər hazırlayacaqlarını bildirib.
Vüqar Ağayev
AZƏRTAC-ın xüsusi müxbiri
Tokio

Tags:  Yaponiyanın internet televiziyası Dünya Azərbaycanlılarının Həmrəylik Gününə həsr edilmiş veriliş yayımlayıb



RƏYLƏR


Top news