Bakı. Trend:
Azərbaycan Prezidenti İlham Əliyevin dövlət sərhədindən buraxılış məntəqələrində sərhəd və gömrük rəsmiləşdirilməsinin sadələşdirilməsi barədə verdiyi tapşırıqların icra vəziyyətinin yoxlanılması məqsədilə Dövlət Sərhəd Xidmətinin (DSX) rəisi – Sərhəd Qoşunlarının Komandanı general-polkovnik Elçin Quliyev və Dövlət Gömrük Komitəsinin (DGK) sədri gömrük xidməti general-leytenantı Aydın Əliyev dekabrın 29-da “Sınıq-Körpü” dövlət sərhədindən buraxılış məntəqəsində olublar.
DSX-nin Mətbuat Mərkəzindən Trend-ə verilən məlumata görə, general-polkovnik E.Quliyev və gömrük xidməti general-leytenantı A.Əliyev şəxslərin və nəqliyyat vasitələrinin dövlət sərhədindən buraxılışı vəziyyətini yoxlayıb, dövlət sərhədindən keçən şəxslərlə söhbət edib və sərhəddən keçərkən üzləşdikləri problemlərlə maraqlanıblar.
DSX və DGK əməkdaşlarının iştirakı ilə birgə xidməti müşavirə keçirilib və vəzifəli şəxslərin məruzələri dinlənilib. Xidməti müşavirə zamanı “Sınıq-Körpü” dövlət sərhədindən buraxılış məntəqəsində tranzit yükdaşımaların həcminin artması ilə əlaqədar meydana çıxan məsələlər müzakirə olunub, şəxslərin və nəqliyyat vasitələrinin dövlət sərhədindən keçmə vaxtının daha da qısaldılması məqsədilə xidməti prosedurların təkmilləşdirilib, dövlət sərhədindən buraxılış məntəqəsində sərhəd və gömrük nəzarətinin daha səmərəli təşkilinə dair konkret tapşırıqlar verilib.
Bizi Twitter-dən izləyin: @trend_az