Ağcabədi, 3 yanvar, AZƏRTAC
Ağcabədi rayonunda uşaqlar üçün rəngarəng və əyləncəli Yeni il şənlikləri davam edir.
AZƏRTAC xəbər verir ki, rayon mədəniyyət evində Ağcabədi şəhər incəsənət məktəbinin şagirdləri tərəfindən təqdim edilən “Qış nağılı” adlı növbəti şənlikdə 1, 5, 7 və 12 nömrəli tam orta məktəblərin şagirdləri iştirak ediblər.
Bayram tədbirində Şaxta baba, Qar qız və nağıl qəhrəmanları uşaqları şənləndiriblər. Musiqi nömrələri, maraqlı səhnəciklər, əyləncəli oyunlar, milli və dünya rəqsləri ilə davam edən tədbirdə uşaqlara bayram hədiyyələri verilib.
