Aktual mövzular: Dollar alış-satışı , Hava haqqında, Qarabağ, Qəbələ, Məzənnə, Neftin qiyməti

Fond bazarı bir gündə 590 milyard dollar itirdi

Fond bazarı bir gündə 590 milyard dollar itirdi

Date: 5 January 2016 12:42

Çinin əsas fond indeksləri - "Shanghai Composite" və "CSI300"  dünən, yanvarın 4-də, 7%-ə yaxın azalıb. Report-un "Bloomberg" agentliyinə istinadən verdiyi xəbərə görə, Çin fond birjalarındakı azalma milli valyuta - yuanın da zəifləməsinə gətirib çıxarıb. CNY/USD məzənnəsi 6,48-dən 0,8% artaraq 6,53-ə çatıb. Honkonqda isə yuanın məzənnəsi son 5 ilin minimumuna (6,63 CNY/USD) enib.

Qeyd edək ki, 2016-cı ilin ilk iş günündə Çin bazarlarında, o cümlədən yuanda analoji sürətli azalmaya əsas səbəb istehsal sektorunda işgüzar fəallıq indeksinin (PMI) proqnozlaşdırılandan zəif açıqlanması olub. Bu göstərici bazar iştirakçıları tərəfindən 49 olması ehtimal edilsə də, faktiki 48,2-ə bərabər olub. Nəticədə, Çinin əsas fond birjaları sərt satışla üzləşib. PMI indeksi ardıcıl olaraq 10 aydır 50 bənddən aşağı həddədir. Bildirək ki, Çin qanunvericiliyinə uyğun olaraq, ölkədəki istənilən birjada indeksdə gündəlik azalma 7%-ə çatarsa, əməliyyatlar dərhal dayandırılır. Dünən, yanvarın 4-də, "Shanghai Composite" indeksi 3536 bənddən 3296 bəndə enib. "Citigroup Inc.", "Deutsche Bank AG" və "Nomura Holdings Inc." kimi nəhəng maliyyə korporasiyalarının nümayəndələri hesab edirlər ki, qanunvericiliyin bu tələbi bir çox investorun satış sürətləndikdə əllərindəki səhmləri daha tez sataraq ondan qurtulmaq istəklərinin satışın ikiqat sürətlənməsinə səbəb olur. Bu gün, yanvarın 5-də, "Shanghai Composite" indeksi 0,5% və ya 15 bənd azalıb və 3280 bəndə bərabərdir, əməliyyatlar hələ davam edir. Qeyd edək ki, Çin fond bazarının ümumi kapitallaşması bu ilin əvvəlinə 8,4 trln. ABŞ dolları təşkil edib.

Çin Xalq Bankı (PBOC) bu gün maliyyə bazarlarına əks-repo əməliyyatları vasitəsilə 130 mlrd. yuan (19,9 mlrd. dollar) likvidlik dəstəyi verib. Əks-repo əməliyyatlarında faiz səviyyəsi 2,25% olub. "Societe General"in Asiya bazarları üzrə faiz strategiyası şöbəsinin müdiri Frensis Çanq (Frances Cheung) bildirib ki, kapital axını likvidlik problemini daha da gücləndirəcək ki, bu da PBOC-un yumşaq monetar siyasəti davam etdirməsinə səbəb olacaq.
"Report"un analitik qrupu hesab edir ki, "Shanghai Compostie"  indeksinin 2016-cı ildə 2300-2500 səviyyəsinə qədər geriləyəcəyi ehtimal olunur. CNY/USD məzənnəsinin bu il ilk mərhələdə 6,80 səviyyəsinə çatması, daha sonra 7,20-8,00 diapazonuna qədər artması proqnozlaşdırılır. 
Qeyd edək ki, yuanın devalvasiyası ABŞ dolları istisna olmaqla, demək olar ki, bütün dünya valyutalarının məzənnəsinə mənfi təsir edəcək.

Milli.Az


Tags:  Fond bazarı gündə 590 milyard dollar itirdi


RƏYLƏR


Top news