Azərbaycanda Prezident təqaüdü alanların sayı açıqlanıb

Azərbaycanda Prezident təqaüdü alanların sayı açıqlanıb
16:27 8 Yanvar 2016
31 Sosial
Ölkə mətbuatı
A- A+

2003-cü illə müqayisədə əmək pensiyalarının orta aylıq məbləğində 9,5 dəfə artım qeydə alınıb
Bakı. 8 yanvar. REPORT.AZ/ Əmək və Əhalinin Sosial Müdafiəsi Nazirliyi tərəfindən əlilliyi olan şəxslərin sosial təminatının gücləndirilməsi, onların maddi və mənəvi tələbatlarının ödənilməsi və tibbi-sosial reabilitasiyası istiqamətində ötən il də məqsədyönlü işlər aparılıb. 
Bu barədə “Report”a nazirliyin İctimaiyyətlə əlaqələr şöbəsindən bildirilib.
Məlumata görə, nazirlik respublikanın müxtəlif bölgələri üzrə 82 fərdi yaşayış evi, hazır yaşayış binalarından alınaraq təmir etdirib 145 mənzil, habelə Tərtər rayonunda 54 mənzilli yaşayış evi, yəni ümumilikdə 281 mənzil müharibə əlilləri və şəhid ailələrinə təqdim olunub. Ötən il daha 400 nəfər müharibə əlili və onlara bərabər tutulan şəxs “Naz-LİFAN” markalı avtomobillə təmin ediliblər.
Nazirliyin respublikanın müxtəlif bölgələri üzrə 14 bərpa-müalicə müəssisəsində hər il orta hesabla 8 min nəfərə yaxın əlilliyi olan şəxs və sağlamlıq imkanları məhdud uşaq bərpa-müalicə xidməti ilə təmin olunur. Cənubi Qafqaz regionunda analoqu olmayan bu mərkəz il ərzində 1 000 nəfərdən çox müvafiq şəxsə müasir tibbi-fizioterapevtik üsullarla xidmət göstərməyə imkan verir. Digər bir sıra bərpa-müalicə müəssisələrində də müasir tələblərə uyğun şərait yaradılmaqdadır.
Ötən il Əmək və Əhalinin Sosial Müdafiəsi Nazirliyi tərəfindən 265 nəfər, o cümlədən 135 nəfər əlilliyi olan şəxs və valideynlərindən birinin müşaiyəti ilə 130 nəfər sağlamlıq imkanları məhdud uşaq xaricə ixtisaslaşmış bərpa müalicəsinə göndərilib ki, bu da ümumən 2014-cü ildə göndərilənlərdən 64,6 faiz çoxdur. Həmçinin hesabat dövründə əlilliyi olan şəxslərə 1273 ədədi əlil arabası olmaqla ümumilikdə 34 mindən çox reabilitasiya vasitəsi və protez-ortopedik məmulat verilib.
“2015-ci il ücün əlilliyi olan şəxslərin və sağlam imkanları məhdud uşaqların sosial müdafiəsi və reabilitasiyası Proqram”ı çərçivəsində nazirlik keçən il ümumilikdə 13,6 mindən çox əlilliyi olan şəxsi və şəhid ailəsini birdəfəlik maddi yardımla təmin edib. Belə ki, Nazirlikdəki müvafiq Komissiyanın qərarları əsasında sosial müdafiəyə daha çox ehtiyacı olan 602 nəfər əlilliyi olan şəxsə sosial-məişət problemlərinin həllinə köməklik məqsədilə birdəfəlik maddi yardımlar verilib. 20 Yanvar faciəsinin ildönümü ilə əlaqədar 112 nəfər 20 Yanvar şəhidinin ailəsi və 316 nəfər 20 Yanvar əlili, Çernobıl AES-də baş vermiş qəzanın ildönümü ilə əlaqədar həmin qəzanın nəticələrinin aradan qaldırılmasında iştirak edərkən əlil olmuş 486 nəfər şəxs birdəfəlik maddi yardımla təmin olunub. Bilik günü ərəfəsində sağlamlıq imkanları məhdud iki və daha artıq məktəbli üzvü olan 1492 ailədəki 3117 uşağa, Beynəlxalq Əlillər günü ilə əlaqədar 8700 nəfər əlilliyi olan şəxsə də birdəfəlik maddi yardımlar ödənilib.
25 nəfər əlilliyi olan şəxsin respublika daxilində müalicəsinə, 53 nəfər əlilliyi olan şəxsin respublikadan kənar müalicəyə göndərilməsinə birdəfəlik maddi yardım ödənilməsi qaydasında köməklik göstərilib. Həmçinin keçən ilin noyabrında Azərbaycanda Əlilliyi olan şəxslərin IX Ümumrespublika Yaradıcılıq Sərgi-müsabiqəsi təşkil olunub. 221 nəfər əlilliyi olan şəxsin və sağlamlıq imkanları məhdud uşağın əl işlərinin təqdim olunduğu tədbirin yekununda qaliblərinə mükafatlar verilməklə yanaşı, digər 200 nəfərə yaxın iştirakçının hər birinə də birdəfəlik maddi yardımlar verilib.
Hazırda ölkədə Azərbaycan Prezidentinin aylıq təqaüdləri ilə təmin olunan şəxslərin 69 faizi müharibə əlilləri və onlara bərabər tutulanlar, 20 Yanvar əlilləri, əmək pensiyası almaq hüququ olmayan ümumi səbəbdən I qrup əlillərdir. 2014-cü ildə müharibə əlilləri və onlara bərabər tutulan şəxslərə təyin olunan Prezident təqaüdlərinin orta aylıq məbləği 50 faizə yaxın artırılıb. Həmçinin aylıq sosial müavinətlə təmin olunanların 59,2 faizi əlilliyi olan şəxslər və sağlamlıq imkanları məhdud 18 yaşadək uşaqlardır. Həmin müavinətlərin orta aylıq məbləği 2004-cü illə müqayisədə 8,1 dəfə, sağlamlıq imkanları məhdud uşaqlara yönələn sosial müavinətin aylıq məbləği isə 7,4 dəfə artırılıb. Eyni zamanda əmək pensiyaçılarının 28,8 faizini əlilliyə görə əmək pensiyası alanlar təşkil edir və 2003-cü illə müqayisədə Azərbaycanda əmək pensiyalarının orta aylıq məbləğində 9,5 dəfə artım qeydə alınıb.

Xəbərin orijinal ünvanı: http://report.az/sosial-mudafie/azerbaycanda-prezident-teqaudu-alanlarin-sayi

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR