Aktual mövzular: Dollar alış-satışı , Hava haqqında, Məzənnə, Neftin qiyməti

Çağataya sarılan qızın atası, jurnalisti hədələyən Könül, gəlin Xatun, əsəbi Xoşqədəm - HƏFTƏBECƏR

Çağataya sarılan qızın atası, jurnalisti hədələyən Könül, gəlin Xatun, əsəbi Xoşqədəm - HƏFTƏBECƏR

Date: 11 January 2016 09:43

Milli.az jurnalist İntiqam Valehoğlunun müəllif layihəsi olan "Həftəbecər"i (61-ci say) təqdim edir.

Söhbətimizə bir utandırıcı xəbərlə başlamalı olacağıq. Deməli, ötən həftə bizim qızlar, daha doğrusu, bizim deyərkən, Bakıda yaşayan bir qrup xanım paytaxtımıza təşrif buyurmuş türkiyəli aktyor Çağatay Ulusoya hücum ediblər. Ölən, yaralanan olmasa da, əldə etdiyim məlumata görə, Çağatay yanındakılardan soruşub ki, bəyəm bu ölkədə kişi qıtlığıdır ki, qızlar özlərini belə buraxıblar? Ardınca əlavə edib ki, bunlara baxanda rusiyalı və ukraynalı qızlar toya getməlidirlər. O yandan da bizim qaqaşlardan biri baxıb-baxıb, axırda özünü saxlaya bilməyib deyib ki, ala, bunlar lap yanıqdırlar ki... 

Yeri gəlmişkən, Çağatay Ulusoy Bakıya baş rolunu oynadığı "Delibal" filminin qala-gecəsində iştirak etmək üçün gəlmişdi. Deyirəm, Tarkanın, Əmrahın üstünə lüt şığıyan qızların biabırçılığı yenicə yaddan çıxmışdı. Buradan özlərini Çağatay üçün şəhid edən, sarılan qızların atalarını və qardaşlarını salamlayıram.

Əli Mirəliyev yenə də həftəyə damğasını vurmağı bacardı. Daha doğrusu, "damğa"nı Könülə vurdu, "Həftəbecər" də öz payını götürdü. Bu arada xatırladım ki, Könül Kərimova məndən bərk inciyib. O gün zəng vurmuşam ki, bəs deyirlər, öldürülən qızıl alverçisinin müştərilərindən biri də siz olmusunuz. Sözüm yarımçıq qaldı. Sonra aramızda təxminən belə bir dialoq oldu:
- Ayə, tova, heş nə danışan döyüləm. O nədi, gedif yazmısan ki, mən guya Təranə Qumrala nəsə demişəm. Heş utanıf-qızarmırsan sən?
- Könül xanım...
- Mən məhkəməyə-zada da verə bilərəm e. İntəhası dedim, ayıfdı, qoy məhkəməyə verməyim.
- Buyurun, verə bilərsiniz.
Elə bunu demişdim ki, telefonu üzümə qapadı. İndi bilmirəm, verəcək, ya verməyəcək.

Hə, onu deyirdim axı. Əli Mirəliyev də gündəmin boş vaxtında tutub Könülün üzündən, boğazından, yanağından öpüb. Hələ mənə dedi ki, "kraskası" olmasaydı, dodağından da öpərdim.

Müğənni Elariz Məmmədoğlu çox yaxşı bir açıqlama verib. Düzdür, bir az sərt alınsa da, həqiqət payı çoxdur. Sənətçi deyib ki, içki qadına, qıza yaraşmır. Səhv deyir? Əlbəttə, yox. Amma ardını bir az qəliz gətirib. İndi şou-biznesin alkaş qadın sənətçicikləri düşəcəklər Elarizin üstünə ki, yox e, sən "nepravsan". Sitat: 
"Mən övladlarıma qadağa qoymağı sevmirəm. Amma içki, siqaret - belə şeylər bizdən uzaq olub. Ələlxüsus da xanıma nə içki, nə siqaret yaraşar. Nənəm deyirdi ki, içki içən qadın hər yola gedər. Çünki ayılanda deyəcək, bilməmişəm də, sərxoş olmuşam. Mən də o fikirlə razıyam".

Rəhmətliyin nəvəsi, hər yol deyəndə ki, bunların bəziləri ayıq başla da o sən dediyin yola gedirlər.

Bu xəbəri daha diqqətlə oxuyun. Çünki Xoşqədəmi bərk əsəbləşdirmisiz. O da götürüb tənqid eləyənləri tənqid eləyib. Söhbətə bax ha, tənqid edənləri tənqid etmək. Sitatı oxuyaq:
"Mən öz dilimdə, yəni türk dilində danışıram. Şükürlər olsun ki, nə erməni, nə rus, nə də başqa dildə yazıram. Gücünüz çatır, rus, ingilis dilində danışanlara irad tutun. Dilimdən xoşunuz gəlmirsə, yaxşı yol. O yazanlar paxıllardır, sadəcə, bəzən onları yerində oturtmaq lazımdır".

Bu arada oxuculara məsləhət görərdim ki, Xoşqədəm xanım efirdə "Ukrayna", "sonra" və sair sözləri tələffüz edəndə diqqətlə qulaq assınlar. Çünki xanım aparıcı dilimizin qrammatikasına, fonetikasına, canım sizə desin, morfologiyasına xeyli yeniliklər gətirib.

Xanəndə Elnarə Abdullayeva ilə müğənni Xatirə İslamın "qadın müğənniylə evlənmək "padlodur", yoxsa "zapadlodur" söhbəti bitmədi ki, bitmədi. Axırıncı dəfə mən eşidəndə söhbət "zapadlo"da qalmışdı. Yenə nə isə bu haqda danışıblar, dedim ki, biləsiniz. Sitat-zad verib vaxtınızı almaq istəmirəm.

Xatun haqda çoxdandır yazmıram. Deyirəm, birdən xətrinə dəyər, daha mənə ara adamlarından nota göndərməz. Bəs ondan sonra mən başıma haranın pulunu tökərəm? Heç bilirdiniz ki, Xatun gəlin vaxtlarında 30 kilo pomidor bağlayıb? Bəli, məhz gəlin vaxtlarında. Axı indi Xatun kişi olub. Bəs bilmirdiniz? Nə isə, belə bir açıqlama verib. Deyib ki, on barmağımda doqquz mərifət var, barmağımın biri mərifətsiz çıxdı. Zarafat edirəm, deyib ki, on barmağımda on mərifət var. Yaxşı söhbətdir. Adamın mərifəti barmağından başlayır.


Tags:  intiqam valehoglu intiqam valehoglu heftebecer

RƏYLƏR


Top news