Aktual mövzular: Dollar alış-satışı , Hava haqqında, Məzənnə, Neftin qiyməti

İspaniya: şahzadə məhkəmə qarşısına çıxarılıb

İspaniya: şahzadə məhkəmə qarşısına çıxarılıb

Date: 11 January 2016 17:48


Bakı, 11 yanvar, AZƏRTAC
İspaniya tarixində ilk dəfə monarx ailəsi üzərində məhkəmə işi başlayıb.
AZƏRTAC RİA Novosti informasiya agentliyinə istinadla xəbər verir ki, kral VI Filippin bacısı, şahzadə Kristina yanvarın 11-də həyat yoldaşı ilə birgə maliyyə fırıldaqçılığı və iri məbləğdə vergidən yayınma barədə suallara cavab vermək üçün Palma-de-Mayorka şəhərindəki məhkəməyə çağırılıb. Şahzadənin əri İnyaki Urdanqari qanunsuz olaraq 6 milyon avroya yaxın vəsaiti mənimsəməkdə şübhəli bilinir.
Təhqiqatın məlumatına əsasən, İnyaki Urdanqarinin kompaniyası şişirdilmiş qiymətlərlə xidmət göstərmək üçün əyalət hökumətlərinin müsabiqələrində qalib gəlib, sonradan isə həmin pullar tərəfdaşların şəxsi hesablarına köçürülüb. Bununla yanaşı, ittiham tərəfi əmindir ki, infanta öz həyat yoldaşının qanunsuz fəaliyyətindən məlumatlı olub və hətta ona kömək edib.
Günahı sübuta yetirilərsə, şahzadəni 8 ilədək həbs cəzası gözləyə bilər. Lakin analitiklər 19 il həbs cəzasına məhkum oluna biləcək həyat yoldaşından fərqli olaraq, şahzadəyə belə ağır cəzanın veriləcəyinə inanmırlar.
Xatırladaq ki, infanta Kristina və onun həyat yoldaşı hələ 2011-ci ildə kral ailəsinin rəsmi tədbirlərində iştirak etməkdən uzaqlaşdırılıb. Ekspertlərin fikrincə, məhkəmə işinin gedişi son illər populyarlığı nəzərə çarpacaq dərəcədə azalan İspaniya monarxiyasına yeni zərbə vura bilər.


Tags:  İspaniya şahzadə məhkəmə qarşısına çıxarılıb


RƏYLƏR


Top news