Aktual mövzular: Dollar alış-satışı , Hava haqqında, Qarabağ, Qəbələ, Məzənnə, Neftin qiyməti

Şəmkirdə müəmmalı yanğınlar təşvişə səbəb olub (FOTO)

Şəmkirdə müəmmalı yanğınlar təşvişə səbəb olub (FOTO)

Date: 11 January 2016 20:58

Bakı. Trend:

Şəmkirin Qaracəmirli kəndində müəmmalı yanğınlar yenidən başlayıb. Bu gecə kənddə daha iki yanğın baş verib.

Trend Kəpəz TV-yə (Region TV) istinadən xəbər verir ki, hadisələrin birində həyətyanı sahədə ot tayası, digərində isə mal-qara və ev quşları ilə birlikdə tövlə alışıb. Sakinlər yanğınların qəsdən törədildiyinə əmindirlər.

İlk yanğın hadisəsi ötən gün axşam saat 23:00 radələrində Müşfiq Mehtiyevə məxsus tövlədə qeydə alınıb. Hadisə yerinə Şəmkir Dövlət Yanğından Mühafizə Hissəsinin 125 saylı bölməsinin canlı qüvvəsi və texnikası cəlb olunub. Yanğınsöndürənlərin səyinə baxmayaraq, tövlənin 120 kvadratmerlik tavan hissəsi və orada saxlanılan 10 ton ot bağlaması yanıb. Tövlədə olan ev quşları da tələf olub. Mal-qara isə tüstüdən zəhərlənib.

Zərərçəkən Gülsabah Mehtiyeva deyib: “680 ədəd ot bağlaması yandı. Tövlə tam sıradan çıxdı. Heyvanlar tüstüdən boğulurdu. Çətinliklə də olsa çıxartdıq. Toyuq-cücənın öləni öldü, qalanı qaldı”.

Digər zərəçəkən Müşfiq Mehtiyev isə bildirib: “Bu, qəsdən törədilir. Kənddə 15-ci belə hadisədir. Həmin gecə bizdən bir saat sonra başqa yerdə də yanğın olub”.

Gecə daha bir yanğın hadisəsi Aidə Zeynalovaya məxsus həyətyanı sahədə baş verib. Yanğın zamanı fərdi təsərrüfatda olan 10 ton ot bağlamasından 5 tonu yanıb. Bir-birinin ardınca baş verən iki yanğın Qaracəmirli kəndinin sakinlərini yenidən təşvişə salıb. Onlar əmindirlər ki, yanğınlar qəsdən törədilir.

Sakin Şəmşid Muradov deyib: “Yandıra-yandıra gedirlər. Polislər də tuta bilmirlər. Qıraqdan gəlirlər, yoxsa kəndin içindən edirlər, bilmirik. Ancaq bu şəkildə yandırırlar”.

Sakinlərin bu əminliyinin səbəbi də var. Ötən ilin avqust-sentyabr aylarında Şəmkirin Qaracəmirli kəndində bir-birinin ardınca 11 yanğın hadisəsi qeydə alınmışdı. Həmin vaxt həyətyanı sahələrdə ot bağlamaları ilə yanaşı, körpələr evi-uşaq bağçası və kənd xəstəxanası da alova qərq olmuşdu.

Bizi Twitter-dən izləyin: @trend_az


Tags:  Şəmkirdə müəmmalı yanğınlar təşvişə səbəb olub FOTO

RƏYLƏR


Top news