Bakı, 14 yanvar, AZƏRTAC
Yanvarın 14-də İndoneziyanın paytaxtı Cakarta şəhərində baş verən partlayışlar seriyası və hücumlar nəticəsində, son məlumata görə, 7 nəfər həlak olub. Onların arasında Niderland vətəndaşı olan BMT əməkdaşı da var. Həlak olanların ikisi dinc sakindir.
AZƏRTAC TASS informasiya agentliyinə istinadla xəbər verir ki, yerli polis Cakartanın mərkəzində baş verən hücumların yeddi yaraqlı tərəfindən həyata keçirildiyini bildirib. Milli polis xidməti rəisinin müavini Budi Qunavananın məlumatına əsasən, insident nəticəsində yaraqlılardan 4-ü öldürülüb.
İndoneziya paytaxtının mərkəzində təhlükəsizlik üzrə vəziyyətin nəzarət altına alındığı bildirilir. Hücumlara görə məsuliyyəti hələlik heç bir qruplaşma üzərinə götürməyib.
