Aktual mövzular: Dollar alış-satışı , Barselona - Real, Hava haqqında, Məzənnə, Neftin qiyməti

Şahid: “Səfər Əbiyev Mehman Səlimova güzəştə gedirdi” - MƏHKƏMƏDƏN

Şahid: “Səfər Əbiyev Mehman Səlimova güzəştə gedirdi” - MƏHKƏMƏDƏN

Date: 15 January 2016 13:29

 

 

Bu gün Bakı Ağır Cinayətlər Məhkəməsində sabiq müdafiə naziri Səfər Əbiyevin müavini olmuş Mehman Səlimovun cinayət işi üzrə məhkəmə prosesi keçirilib.

 

Lent.az-ın məlumatına görə, hakim Zeynal Ağayevin sədrliyi ilə keçirilən prosesdə şahidlər ifadə verib.

 

İlk olaraq 2009-2013-cü illərdə Müdafiə Nazirliyinin Mənzil İstismar İdarəsində çalışmış, bir müddət isə idarənin rəisi olan Hafiz Əliyev ifadə verib. O, ifadəsində sifariş verdikləri tikintilərin  gecikməsindən danışıb: "Hazırda Naxçıvan qarnizonun xidmət rəisiyəm. Mehman Səlimov tikinti işləri dövründə tanış olmuşuq. Bilirdim ki, keçmişdə nazir müavinimiz olub. O zaman sifarişçi kimi iki bina, yeməkxana, qazanxana tikdirirdik. İşlər danışdığımız vaxtdan keçmişdi. Yazılı və şifahi cəhətdən Mehman müəllimə bu barədə iradımızı bildirmişdik. Bir neçə dəfə də müqavilə təzələmişik. Məsələ ilə sabiq nazir Səfər Əbiyevə də məruzə eləmişəm. Səfər Əbiyevin Mehman Səlimovla şəxsi münasibəti olduğu üçün ona güzəştə gedirdi. Mehman Səlimovun işləri gecikdirməsində həm üzrlü, həm də üzrsüz səbəblər var. Mən özünə dəfələrlə demişəm ki, işçiləri dəyişsin. Ona daha peşəkar mütəxəssislərlə çalışmağı məsləhət görürdüm. İşlə əlaqədar Mehman Səlimova artıq pul ödənilməyib. Onun həmin məbləği mənimsədiyini deyə bilmərəm".

 

Müdafiəçilər şahidin məhkəmədə verdiyi ifadə ilə istintaqa verdiyi ifadə arasında ziddiyyət olduğunu bildiriblər. Şahid müdafiəçilərin suallarını cavablandırıb.

 

Hafiz Əliyevdən sonra şahid qismində 2009-2013-cü illərdə Müdafiə Nazirliyinin Maliyyə şöbəsinin rəisi olmuş Elçin Mehdiyev ifadə verib. O, ifadəsində 1995-ci ildən nazirliyin maliyyə şöbəsində çalışdığını bildirib: "Həmin müddətdə bizim nazir müavinimiz olub. Sonradan vəzifəsindən gedəndən sonra onu xeyli görmədim. Maliyyə şöbəsinə rəis təyin ediləndən sonra bildim ki, Mehman Səlimovun tikinti şirkəti var. Onunla Müdafiə Nazirliyi arasında tikinti işləri ilə bağlı müqavilə imzalanmışdı. Ora vəsatətlər Müdafiə Nazirliyinin büdcəsi tərəfindən deyil, Nazirlər Kabineti və Maliyyə Nazirliyi tərəfindən ayrılırdı. Biz özbaşına pul ödəyə bilməzdik. Göstəriş verildi, sənədləri hazırlayırdıq. Vəsaitlər xəzinədarlıqdan ödənilirdi".

 

Məhkəmə prosesi yanvarın 22-i davam edəcək.

 

Səlimov Cinayət Məcəlləsinin 179.3.2-ci (mənimsəmə - külli miqdarda törədildikdə) və 308.2-ci (vəzifə səlahiyyətlərindən sui-istifadə etmə) maddələri ilə ittiham olunur.

 

M.Səlimov 1995-1999-cu illərdə Azərbaycan müdafiə naziri Səfər Əbiyevin siyasi və ictimai işlər üzrə müavini olub.

 


Tags:  Şahid Səfər Əbiyev Mehman Səlimova güzəştə gedirdi MƏHKƏMƏDƏN

RƏYLƏR


Top news