A–
Pekin, 14 mart, AZƏRTAC
Çinin paytaxtı Pekində Azərbaycana Şanxay Əməkdaşlıq Təşkilatının (ŞƏT) Dialoq üzrə Tərəfdaşı statusunun verilməsinə dair memorandum imzalanıb. Sənədi Çində işgüzar səfərdə olan xarici işlər naziri Elmar Məmmədyarov və ŞƏT-in baş katibi Rəşid Alimov imzalayıb.
Mərasimdə təşkilatın üzvü olan, müşahidəçi və Dialoq üzrə Tərəfdaşı olan ölkələrin, o cümlədən Rusiyanın, Qazaxıstanın, Özbəkistanın, Türkiyənin, Pakistanın, Monqolustanın, Kambocanın səfirləri iştirak ediblər.
İmzalanma mərasimindən əvvəl keçirilmiş görüşdə tərəflər yeni mərhələyə daxil olan Azərbaycan-ŞƏT əməkdaşlığının hər iki tərəf üçün faydalı olacağına əminlik ifadə olunub.
Şanxay Əməkdaşlıq Təşkilatının Dialoq üzrə Tərəfdaşı statusunu əldə etmənin ölkəmiz üçün vacib hadisə olduğunu qeyd edən nazir E.Məmmədyarov bildirib ki, Azərbaycan ŞƏT-də təmsil olunan ölkələr ilə ikitərəfli qaydada dərin münasibətləri vardır.
ŞƏT-in baş katibi Rəşid Alimov ötən il Bakıda olduğunu və paytaxtımıza heyran qaldığını qeyd edib.
Görüşdə ölkələrin ərazi bütövlüyü və suverenliyi, sivilizasiyalararası dialoq, nəqliyyat və turizm məsələləri, o cümlədən qədim İpək yolu üzrə yük daşımaları mövzuları toxunulub. Qeyd olunub ki, üzvləri İpək yolu üzərində yerləşən ŞƏT-in Azərbaycan ilə əməkdaşlığının dərinləşməsi nəqliyyat sahəsində yeni imkanlar açacaq.
Xatırladaq ki, Şanxay Əməkdaşlıq Təşkilatının ötən ilin iyulunda Ufa şəhərində keçirilmiş zirvə görüşündə Azərbaycana bu təşkilatın Dialoq üzrə Tərəfdaşı statusunun verilməsi barədə qərar qəbul olunub.
ŞƏT 2001-ci il iyunun 15-də Şanxay şəhərində Çin, Rusiya, Qazaxıstan, Qırğızıstan, Tacikistan və Özbəkistanin iştirakı ilə yaradılan dövlətlərarası beynəlxalq təşkilatdır. Məqsədi üzv ölkələr arasında qarşılıqlı etimadı və mehriban qonşuluq münasibətlərini möhkəmləndirmək, onları siyasi, ticari-iqtisadi, elmi-texniki və mədəni, habelə təhsil, energetika, nəqliyyat, turizm, ətraf mühitin mühafizəsi sahəsində səmərəli əməkdaşlığa təşviq etmək, regionda sülhün, sabitliyin və təhlükəsizliyin birgə dəstəklənməsi və təminatında iştirak etməkdir.
Təşkilatın ali orqanı iclasları ildə bir dəfə keçirilən dövlət başçıları şurasıdır. Bundan başqa, hökumət başçıları şurası, parlament rəhbərlərinin, təhlükəsizlik şurası sədrlərinin, xarici işlər, müdafiə, iqtisadiyyat və digər sahələr üzrə nazirlərin, hüquq mühafizə orqanları rəhbərlərinin görüşləri mexanizmləri də fəaliyyət göstərir. Katibliyi Pekində yerləşən ŞƏT-də İran, Əfqanıstan, Monqolustan, Belarus, Hindistan və Pakistanın müşahidəçi statusu var. Azərbaycan, Türkiyə, Şri-Lanka, Kamboca, Nepal və Ermənistan təşkilatın Dialoq üzrə Tərəfdaşıdır.
Şahin Cəfərov
AZƏRTAC-ın xüsusi müxbiri
Pekin
AZERTAG.AZ :Pekində Azərbaycanın ŞƏT-in Dialoq üzrə Tərəfdaşı statusunun verilməsinə dair memorandum imzalanıb
