Ötən ilin oktyabrında “Neftçi”dən qarşılıqlı razılıq əsasında müqaviləsini ləğv edib, ayrılan Bruno Bertuççi özünə yeni klub tapıb. Apasport.az saytının məlumatına görə, braziliyalı futbolçu karyerasını bundan sonra vətənində davam etdirəcək.
24 yaşlı sol cinah müdafiəçisi "Portuqeza" ilə anlaşıb. O, C seriyası təmsilçisi ilə mövsümün sonuna kimi müqavilə imzalayıb.
Qeyd edək ki, 2009-cu ildə Braziliyanın U-20 milli komandasının heyətində 7 oyuna 1 qol vuran Bruno Bertuççi “Korintians” (Braziliya) və “Qrashopper” (İsveçrə) kimi klublarda forma geyinib. 2012-ci ildən “Neftçi”də çıxış edən Bertuççi Azərbaycan çempionu və ölkə kubokunun qalibi olmaqla yanaşı, Avropa Liqasının qrup mərhələsi oyunlarında da iştirak edib.